Сэтинньи 15 күнүгэр Бүтүн Арассыыйатааҕы В.К. Арсеньев аатынан “Уһук Илин» литературнай бириэмийэ дьүүллүүр сүбэтэ финалистар кылгас испииһэктэрин таһаарда. Кыайыылаахтары наҕараадалааһын ахсынньыга “Москваҕа Уһук Илин эрэгийиэннэрин күннэригэр” буолуоҕа.
Финалга кимнээх киирдилэр?
“Улахан проза” номинацияҕа Приморьеттан Игорь Кротов (“Чилима”), Лев Сысоров (“Города и моря”), Александр Филькин (“Надпись на Евангелии”) киирдилэр.
“Кылгас проза” номинацияҕа – Сахалинтан Любовь Безбах (“Шепот ночного дождя”), Санкт-Петербуртан Павел Панов (“Солнцепоклонник Кэвэвтэгин»), ону тэҥэ, саха норуодунай бэйиэтэ Наталья Харлампьева («Признание в любви») киирдилэр.
«Проза для детей» номиyацияҕа — Забайкальскай кыраайтан Нина Беломестнова («Золотая нить»), Амурскай уобаластан Валентина Телухова («Захарка»), Андрей Черкасов уонна Варвара Хоменкер («Записки о Дальнем Востоке»).
Бу финалистартан хас биирдии номинацияттан кыайыылаах быһаарыллан, 500 тыһыынча солкуобайынан наҕараадаланыахтара.
В.К. Арсеньев аатынан “Уһук Илин” Бүтүн Арассыыйатааҕы литературнай бириэмийэ РФ бырабыыталыстыбатын бэрэссэдээтэлин солбуйааччы-Уһук Илин федеральнай уокурукка бэрэсидьиэн боломуомучуйалаах бэрэстэбиитэлэ Юрий Трутнев көҕүлээһининэн тэриллибитэ.
Ангелина Васильева, “Саха сирэ” хаһыат, edersaas.ru
Хаартыска: СИА.