Өрөспүүбүлүкэтээҕи физика-математика оскуолатын (РФМШ) 1990 сыллааҕы выпускнигын Арсен Томскайы кытта, тохсунньу 28 күнүгэр, лиссиэйгэ көрсүһүү буолбута.
Бэлиэтээн этэр буоллахха, Арсен Томскай бар дьоҥҥо inDriver кинигэ ааптарынан уонна ситиһиилээх ыччатынан биллэр. Кини бу көрсөһүүгэ кэлэн баран, төрөөбүт оскуолатыгар биир мөлүйүөн суума бэлэҕи туттарбытын туһунан социальнай ситимҥэ киэҥник тарҕаммыта.
Махталлаах үөрэнээччи дьоһун бэлэҕинэн оскуола кэлэктиибэ LED экран ыларга быһаарыммыттар уонна Пермь куоракка баар «Люмилед» хампаанньа атыы-эргиэн дьыалаларыгар эппиэттээх исписэлииһэ Дмитрий Переваловы кытта кэпсэтиспиттэр. Бу кэпсэтиһии кэмигэр дойду үрдүнэн коронавирус дьаҥа өрө турбута. Кэтэһиилээх таһаҕас бэс ыйын саҥатыгар Дьокуускай куоракка кэлбит. Дьаҥ балаһыанньата дойду үрдүнэн арыый намтаабыт кэмигэр Пермь куораттан анал исписэлиистэр Сергей Жуланов уонна Сергей Фомин кэлэннэр бэрт түргэнник уонна сатабыллаахтык экраны оскуолаҕа туруорбуттар, хайдах туттарга үөрэппиттэр. Өрөспүүбүлүкэ лиссиэйэ үөрэх сыла аһыллан, бу бэйэлээх аныгы тэрилинэн үөрэнээччилэр уонна учууталлар астына тутталларын кэтэһэр. Дьоһун бэлэҕи оҥорбут ситиһиилээх үөрэнээччигэ оскуола кэлэктиибэ ис сүрэҕиттэн махтанар уонна выпускник үөрэммит кыһатын өйүүрүттэн астынар, киэн туттар.
Ульяна Захарова.
