Арсен Томскай пуондата Өймөкөөн улууһун квадракоптерынан, араадьыйа ыстаансыйатынан хааччыйда

Бөлөххө киир:

Бу күннэргэ урбаанньыт Арсен Томскай салайар кэмиэрчэскэйэ суох уопсастыбаннай тэрилтэ Sinet Spark пуондата Өймөкөөн улууһугар ойуур баһаарын бохсууга туһанар анал тэриллэринэн хааччыйда.

Пуонда үлэһиттэрэ квадрокоптер, араадьыйа ыстаансыйалара, уу кутар суумкалар (РЛО), бензининэн үлэлиир мотопомпалар, сухой паектар, лаппаакылар, спутниковай төлөпүөннэр, респиратордар, буруоттан көмүскэнэр ачыкылар уо д.а. курдук баһаары бохсууга олус наадалаах тэриллэри улуус дьаһалтатыгар туттардылар.

«Өймөкөөн улууһа (оройуона)» МТ баһылыга Иннокентий Сивцев иһитиннэрбитинэн, улууска баһаар сезона саҕаланыаҕыттан 340 тыһ.га иэннээх сиргэ 139 «ландшафтнай» дэнэр ойуур баһаар барда. Онтон ойуура — 273 тыһ.га.

— Улууска буолбут биэс бөдөҥ баһаартан үһэ — Төрүт, Үчүгэй, Өймөкөөн нэһилиэктиэригэр чугаһыыр кутталлана сылдьыбытын, улахан ардах түбэһэ түһэн умулларда.

Бүгүҥҥү туругунан улууска ыраах сиргэ түөрт баһаар баара биллэр. Бу баһаардар «авиационнай хонтуруол» көрүҥүнэн бэлиэтэммиттэрэ.

Sinet Spark Өймөкөөн улууһун курдук хайалаах дойдуга баһаар уотун умулларыы олус эрэйдээҕин учуоттаан, бэрт наадалаах тэриллэри көмөҕө уунна. Квадрокоптер, араадьыйа ыстаансыйалара курдук баһаары кэтээн көрүүгэ, үөрэтиигэ туттуллар тэриллэр ыраах хоту улуус олохтоохторугар саамай наадалаахтарын быйылгы ойуур баһаарыгар бэйэбитинэн биллибит.

Арсен Томскай хамаандата саамай ыарахан кэмҥэ биир дойдулаахтарыгар көмөлөһөр соруктаах олус туһалаах пуонаданы тэрийэн үлэлэтэллэригэр улууһум олохтоохторун ааттарыттан барҕа махталбын тиэрдэбин, — диэн улуус баһылыга Иннокентий Сивцев санаатын үллэһиннэ.

Атырдьах ыйа Өймөкөөн улууһугар эмиэ кураан ыйынан буолар сибикилээх. «Өймөкөөн» МТ баһылыга Павел Васильев бэлиэтииринэн, саамай кутталлааҕа, уот сир кырсын аннынан умайа сытан көрдүгэнниир. Онон кураан күҥҥэ күүстээх тыал түстэ да, ойуур баһаара эмиэ күүдэпчилэнэр кутталлаах.

— Өймөкөөн нэһилиэгэр буолбут улахан баһаарга «Богуславец» көмүс хостуур тэрилтэ биир бастакынан көмөҕө кэлэн, уу баһар массыынатынан, тыраахтарынан үлэлээн, олохтоохтортон мобилизацияламмыт биригээдэҕэ улахан өйөбүлү оҥорбута. Ханнык баҕарар уустук да, үөрүүлээх да түгэммитигэр шефтээх тэрилтэбит улаханнык өйүүр, — диэн махтанар Павел Валентинович.

Ити курдук, Өймөкөөн улууһун салалтата уонна тыа сирин баһылыктара «баһаар тохтоон хаалла» диэн уоскуйбакка, Дьокуускай куоракка командировкаҕа сылдьар кэмнэрин туһанан, ойуур баһаарын бохсууга аналлаах олус наадалаах тэриллэринэн кэмигэр хааччыналлара — бастыҥ холобур.

Елена ПОТОЦКАЯ, “Саха сирэ” хаһыат, edersaas.ru

Хаартыска: Sinet Spark пуонда саайтыттан.