![](https://edersaas.ru/wp-content/uploads/2020/04/YAGSHA-2-e1587521494137.jpg)
Арктикатааҕы судаарыстыбаннай агротехнологическай университет (уруккута ДьТХСА) ректора аан маҥнайгытын социальнай ситимнэринэн быһа сибээскэ тахсан, устудьуоннар, абитуриеннар, төрөппүттэр ыйытыыларыгар хоруйдаата.
Санатан эттэххэ, Тыа хаһаайыстыбатын академията аҕыйах хонуктааҕыта, РФ Тыа хаһаайыстыбатын министиэристибэтин бирикээһинэн, Арктикатааҕы судаарыстыбаннай агротехнологическай университет аатын сүкпүтэ. Онон быйыл бүтэрэр устудьуоннар маҥнайгынан университет дипломун тутуохтара диэн ректор быһа сибээс кэмигэр иһитиннэрдэ.
Күн бүгүн университет биэс бакылтыаттаах кэллиэстээх уонна Өктөмнөөҕү филиал баар. Быйыл күнүскү үөрэххэ, уопсайа, 46 үөрэх бырагыраамата бигэргэммит. Ону тэҥэ, теплотехник, теплоэнергетик, судаарыстыбаннай уонна муниципальнай салайыы курдук саҥа идэлэри аһары туруорсаллар эбит. Кэлэр сыл бүтүүтэ юридическай үөрэх туһунан толкуйдуохпут диэн эттэ.
“Атастаһыы бырагырааматынан үлэбитин салгыахпыт. Билигин Казахстаны, Германияны, Кытайы, Канаданы, Казахстаны, Польшаны, Американы кытта үлэлэһэбит”, — диэн ректор иһитиннэрдэ.
Аны күһүҥҥүттэн “Эспорт образования” бырагыраама иһинэн, англия тылынан үөрэтэр хайысхалары аһыахтара. Ону тэҥэ, балаҕан ыйын 1 күнүттэн авто оскуола аһан, “В” категорияҕа уонна тыраахтар ыытарга үөрэтэн, кэлэр сылтан диплому сэргэ массыына, тыраахтар бырабаатын сибэдиэтэлистибэтин туттарар былааннаахтар.
Ити курдук, Арктикатааҕы судаарыстыбаннай агротехнологическай университет саҥа үктэлгэ дабайар.
Людмила ПОПОВА «Саха сирэ» хаһыат, edersaas.ru