Култуура уонна искусство Арктикатааҕы института абитуриеннары күүтэр

Култуура уонна искусство Арктикатааҕы институтугар абитуриеннартан докумуону бэс ыйын 19 күнүттэн тутан саҕалыахтара. Хамыыһыйа атырдьах ыйын 17 күнүгэр үлэтин түмүктүөҕэ.

Ол эрээри, айар хайысхалаах идэҕэ туттарсааччылар эбии тургутууну ааһар буолан, кинилэргэ болдьох арыый эрдэ олохтонуоҕа — атырдьах ыйын 3 күнүгэр диэри. Атырдьах ыйын 4 күнүттэн туттарсааччылар айар дьоҕурдарын көрүү саҕаланыаҕа.

Быйыл Арктика институтугар Российскай Федерация бүдьүөтүттэн уонна өрөспүүбүлүкэбит үбүлүүр миэстэтин ахсаана урукку сыллардааҕар эбилиннэ. Ол курдук, 21 хайысхаҕа федеральнай үптэн көрүллэр 173 миэстэ баар — 124 күнүскү, 49 кэтэхтэн үөрэнэргэ. Өрөспүүбүлүкэ бүдьүөтүттэн — 47 миэстэ. Ааспыт сылы кытта тэҥнээтэххэ, барыта икки бүк кэриҥэ элбээтэ.

Эбии төлөбүрдээх үөрэх эмиэ баар. Онно 50 %-ҥҥа диэри чэпчэтиинэн туһаныахха сөп. Бу туһунан сиһилии үлэ чааһын кэмигэр хамыыһыйаттан билсиэххэ сөп.

Манна билигин айар ыччат талаһар идэтэ арааһа баар: дизайнер, киинэ уонна тыйаатыр артыыһа, живопись, графика, ювелирнай оҥорон таһаарыы, хореография, вокал, муусука, фольклор араас хайысхата, култуура эйгэтигэр салайааччы, продюсер, маассабай тэрээһини сүрүннээччи, ону таһынан бибилэтиэкэ үлэһитэ, информатик-программист, музеолог, искусствоны, култуураны чинчийээччи.

Үөрэх хайысхаларын туһунан сиһилии манна билсиҥ: agiki.ru, instagram.com

Институт пресс-сулууспата.