Култуура Сүрүн

Арктикатааҕы эпос уонна искусство киинин тутууга быйылгы былаан толоруллубут

Бэҕэһээ, сэтинньи 24 күнүгэр,  Ил Дархан Айсен Николаев «Саха сирин судаарыстыбаннай филармонията уонна Дьокуускай куоракка  Арктикатааҕы эпос уонна искусство киинэ» диэн бырайыагы олоххо киллэриигэ  аналлаах мунньаҕы ыытта.

«Бырайыагы олоххо киллэриигэ аналлаах  быйылгы былаан толоруллубут.  Эбийиэк ис өттүн оҥорууга олохтоох исписэлиистэр, худуоһунньуктар кыттыахтаах этилэрэ.  Сүрүн болҕомто саала акустикатыгар ууруллуохтаах, ол эбэтэр, Судаарыстыбаннай филармония дойду үрдүнэн биир бастыҥнар кэккэлэригэр баар буолуохтаах», –  диэн Ил Дархан  Айсен Николаев быһааран биэрдэ. Айсен Сергеевич  Саха сирин  уонна Арассыыйа култууратыгар сүрүн миэстэни ылыахтаах эбийиэккэ үлэлиэхтээх исписэлиистэри билиҥҥиттэн бэлэмнээн саҕалыыры ыйда.

«Семнадцатая концессионная компания» ХЭУо  генеральнай дириэктэрэ Сергей Парсаданян: «Билигин бырайыак быһыытынан оборудованиеларынан, дизайнерскай үлэлэринэн  дьарыктаныы барар. Балары  эһиил муус устар ыйы аһардыбакка үмүрүтүөхпүтүн наада. 1500 сыбаайаны  саайдыбыт,  11800 куб.м бетону куттубут. Онон акылааты оҥорууну барытын түмүктээтибит», — диэн дакылааттаата.

Мунньахха  судаарыстыбаннай сүбэһит Андрей Борисов  эбийиэги киэргэтии, ис өттүн оҥоруу кэпсиэпсийэтин туһунан кэпсээтэ.  Ол курдук, киириигэ аналлаах эргимтэ, орто саалаҕа сиэри-туому ыытарга аналлаах ураһа баар буолуохтаахтар. Маны олохтоох дизайнердар былааннаабыттар. «Биһиги театральнай худуоһунньуктарбыт бэйэлэрин этиилэрин киллэрбиттэрэ. Эскизтэр бэлэмнэр, олору бэдэрээтчиттэри кытары быһаарсарбыт эрэ хаалла. Атын дойду дизайнердара алаас диэн тугун билбэттэр, онон итинэн олохтоох худуоһунньуктар эрэ ылсан үлэлииллэр», —— диэн Андрей Саввич быһааран биэрдэ.

Санатар буоллахха,   култуурунай-аралдьытар  класстеры тэрийиигэ (Саха сирин судаарыстыбаннай филармониятын уонна  Дьокуускай куоракка Арктикатааҕы эпос уонна искусство  киинин тутуу)  аналлаах Сөбүлэһии 2019 сыллаахха Илиҥҥи экэнэмиичэскэй  форумҥа түһэрсиллибитэ.

 

edersaas.ru

0
0