«Саха сирин Арктиката» («Якутская Арктика») эрэгийиэннээҕи уопсастыбаннай тэрилтэ бу күннэргэ аһымал аахсыйалары сүрүннүүр анал ыстаап тэрийдэ. Арктическай улуустар мустан сүбэлэһэн баран, өрөспүүбүлүкэ биир бөдөҥ арктическай улууһугар, чуолаан Суордаах олохтоохторун өйүүргэ быһаарбыттара.
Бу туһунан СӨ Эргиэҥҥэ уонна бырамыысаланнаска палаататын эппиэттээх үлэһитэ Лариса Скобелева маннык кэпсээтэ:
— Бастакы тэрээһин мунньахха «Саха сирин Арктиката» уопсастыбаннай тэрилтэ чилиэнэ, Дьааҥы улууһун биир дойдулаахтарын сэбиэтин салайааччы Гаврил Чемоханов кыттыыны ылбыта. Ыстаап чилиэннэрэ арктическай улуустарга эрийэн, өйөбүл көрдөөбүттэрин түмүгэр бастакынан Анаабыр улууһун дьаһалтата илиитин утары ууммута.
Александр Михайлов (Н. Е. Андросов аатынан унитарнай тэрилтэ генеральнай дириэктэрэ) салалтатынан суһаллык матараастары, сыттыктары, утуйар таҥас кэмпилиэгин «Азбука» маҕаһыыннар тиһиктэрэ (дириэктэр Нина Семенова) Суордаах оскуолатыгар тус аадырыстаах көмөнү оҥорбута. Үөрэнээччилэргэ оскуола тээбириннэрин, 7 бастакы кылааска үөрэнэ киирэр оҕо бэлэхтэрин ыыппыта. «Хозмаркет» ХЭУо (салайааччы Максим Феоктистов) бытовой химияны, суунар сириэстибэлэри, Автодорожнай техникум (дириэктэр Валентина Попова), ууга барбыт нэһилиэктэртэн кэлэн, «Бэс Чагдаҕа» сынньана сытар оҕолорго биэс утуйар таҥас кэмпилиэгин бэлэхтээбитэ.
«Розтор» (генеральнай дириэктэр Валерий Алексеев, «Айар», кинигэ кыһата (генеральнай дириэктэр Август Егоров), «Дьокуускай аптекалара» МУП (дириэктэр Екатерина Федорова), «Дьукээбил» ансаамбыл чилиэннэрэ (салайааччы Тамара Попова) улахан көмөнү оҥордулар. Билигин ыстаап Дьокуускайдааҕы епархияны, «Сахабулт» Национальнай концерны, национальнай общиналары кытта үлэлэһэр. Ураты усулуобуйаҕа «Саха Арктиката» уопсастыбаннай тэрилтэ чилиэннэрэ «Полярные авиалинии» (салайааччы Семен Винокуров), «Якутоптторг» (салайааччы Николай Алексеев) куруус тиэйиитигэр, аһы-үөлү тиэрдиигэ үлэлэһэллэр.
Саха Арктика» уопсастыбаннай тэрилтэ бэрэсидьиэнэ, норуот дьокутаата Елена Голомарева көҕүлээһининэн арктическай улуустар бары иэдээҥҥэ түбэспит Дьааҥы улууһугар көмөлөһө олороллор.
Елена ПОТОЦКАЯ, «Саха сирэ» хаһыат.