Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Денис Белозеров салалтатынан Саха Өрөспүүбүлүкэтин балык анадромнай көрүҥнэрин бултааһыны сүрүннүүр хамыыһыйа мунньаҕар Арктика уомула бултанар өрүстэригэр эбии научнай чинчийиини ыытар туһунан кэпсэттилэр.
Тэрээһин кыттыылаахтара 2019 сылга уомулу бултааһын кээмэйин олохтооһуну, бэйэ сииригэр уонна спортивнай балыктааһыны тэрийиини, юридическай сирэйдэргэ уонна урбаанньыттарга бултааһын кээмэйин тыырыыны дьүүллэстилэр.
Хамыыһыйа туһанааччылар сайаапкаларын сиһилии үөрэттэ. Балык бу көрүҥүн харыстыыр туһугар научнай-чинчийэр үлэни күүһүрдүөхтэрэ.
“Арктика уомула бултанар сүрүн өрүстэрин салгыы үөрэтии улахан суолталаах, ити балыктыыр хаһаайыстыбалар түһэрбит сайаапкаларыгар олоҕуран сөптөөх квотанан хааччыйарга көмөлөөх буолуоҕа. Бүгүн хамыыһыйа киирбит сайаапкаларга сөбүлэһэрин биллэрдэ. Ол эрээри кэккэ хаһаайыстыбаларга чопчу соругу туруорабыт — элбэхтик өрүс үөһүгэр бултуурга. Холобура, “Арктика” балык артыала Булуҥ оройуонугар сүрүн тэрилтэнэн буолар. Бөһүөлэк нэһилиэнньэтэ бары кэриэтэ балыктааһынынан дьарыктанар. Ол иһин, балык популяциятын харыстыыр туһугар өрүс үөһүгэр балыктыыр туһунан боппуруоһу туруорабыт. Онон хаһаайыстыба сайаапкатын бу өттүгэр хаттаан көрүөххэ. Научнай чинчийиилэри ыытыы квотаны үрдэтэр кыаҕы биэрэн, нэһилиэнньэ дохуот аахсарыгар көмөлөһүөҕэ”, — диэтэ хамыыһыйа бэрэссэдээтэлэ Денис Белозеров.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.