Арктика улуустарыгар өрүһүнэн сырыы алтынньы 15 күнүгэр диэри уһатылынна
«Өлүөнэтээҕи холбоһуктаах пароходство» ПАУо флоту туһаныыга управлениета иһитиннэрбитинэн, таһаҕаһы тиэйии былаана барыта туолбут.
Бүгүҥҥү туругунан 1 мөл. 300 тыһ. туонна таһаҕас, ол иһигэр 420 тыһ. туонна ньиэп бородууктата тиэрдиллибит. Онон суудуналар төттөрү кыһын кыстыахтаах сирдэригэр төннөн эрэллэр. Тустаах хампаанньа сөптөөхтүк былааннаан үлэлээбитин түмүгэр, Халыма өрүстэр тардыыларыгар олорор нэһилиэнньэлээх пууннарга ньиэп бородууктата барыта сүөкэниллибит. Билигин таас чоҕу уонна наадалаах таһаҕаһы тиэйии бара турар. Дьааҥы өрүс тардыытыгар сытар улуустарга таһаҕаһы тиэрдии түмүктэммит.
Бүгүн, алтынньы 1 күнүгэр, Арассыыйатааҕы өрүс регистрын Өлүөнэтээҕи филиалыгар Арктика улуустарыгар уунан сылдьыы алтынньы 15 күнүгэр диэри уһатылларын туһунан анал көҥүлгэ илии баттанна.
edersaas.ru