Саха Өрөспүүбүлүкэтэ бу дьыл муус устар 1 күнүгэр таһаарбыт 308-р №-дээх дьаһалынан, Арктика улуустарыгар уонна киинтэн ыраах сытар улуустарга уу суолунан 7 411 туонна социальнай суолталаах табаар тиэрдилиэхтээх.
edersaas.ru
Бу иһигэр 550 туонна хортуоппуй, оҕуруот аһа уонна 6 256 туонна бурдук баар. Хотугу улуустарга таһаҕаһы таһыыга урукку сыллартан таһаарыылаахтык үлэлиир «Магдебург», «Мальчиков» теплоходтары таһынан «СТК-1012» аал илдьэллэр, төннөллөрүгэр балык тиэйэн аҕалаллар. Оттон Бүлүү уонна Алдан өрүстэринэн табаары СПО-826 теплоход таһар.
Билиҥҥи туругунан 5 382 туонна таһаҕас тиэрдилиннэ. Ааспыт ый бүтүүтүгэр ааллар Эдьигээн, Абый, Аллайыаха, Үөһээ Халыма уонна Орто Халыма улуустарыгар 1 134 туонна таһаҕаһы, ол иһигэр 843 туонна бурдугу илдьэ барбыттара. Кэллилэр да, хортуоппуйу уонна оҕуруот аһын тиэйэн барыахтара. Онон хотугу собуоска сыллата үлэлиир дуогардаах хаһаайыстыбалар хортуоппуйдарын хостоон, хаппыысталарын быһан бэлэмнии сылдьаллар.
Раиса Сибирякова, «Саха сирэ» edersaas.ru