СӨ Инновацияҕа, сыыппара сайдыытыгар уонна инфокоммуникация технологияларыгар миниистир Анатолий Семенов быһа биэриигэ дьон-сэргэ ыйытыытыгар хоруйдаата.
edersaas.ru
Дьон-сэргэ сүрүннээн интериниэт, суотабай сибээс түргэнин, төлөбүрүн тула ыйытыыны биэрдилэр.
Миниистир этэринэн, “Ростелеком” хампаанньаны кытта бииргэ үлэлэһиинэн уонна ВОЛС ситимэ тардыллан, өрөспүүбүлүкэ олохтоохторо түргэн интэриниэт, “интерактивнай тэлэбиидэнньэ”, Wink видеосервис, видео сибээс, “Өйдөөх дьиэ”, уо.д.а. сибээс аныгы телекоммуникационнай өҥөлөрүгэр холбоннулар.
Билиҥҥи туругунан, хас да улууһу кытта сөбүлэҥ, дуогабар түһэрсэн, хас да нэһилиэнньэлээх пууҥҥа оптоволокно ситимэ тардыллыа диэн эттэ. Ол курдук, түргэн тэтимнээх сибээс Бүлүү бөлөх улуустартан салгыы Өлөөҥҥө тиийиэҕэ. Онтон Анаабырга суолу тэлиэхпит диэн Анатолий Семенов үөрүүлээх сонуну иһитиннэрдэ. «Муоманы, Үөһээ Халыманы кытта сөбүлэҥи түһэристибит. Баатаҕай, Эдьигээн эмиэ холбонуо”, — диэн эрэннэрдэ. “Оттон Тиксии сибээһэ федеральнай таһымҥа тахсар. “Единый Булун” диэн бырагырааманан 2023 – 2024 cылларга холбонуохтара”, — диэтэ.
Анатолий Семенов тарыыптар боппуруостарыгар эмиэ тохтоото. “Өскөтүн 2012 сыллаахха оптоволокно ситимэ Саха сиригэр аан бастаан кэлиитин кытары тэҥнээн көрдөххө, тарыып сөкүүндэҕэ 1 мбит 65 төгүл чэпчээтэ. Оттон Бүлүү улуустарыгар сыаната 39 төгүл түстэ. Аны, хоту оройуоннарга интэриниэт ситимэ киирэн истэҕин аайы, сыана сыыйа чэпчиирин ситиһэр сорук турар”, — диэн эттэ.
Маны сэргэ, миниистир өрөспүүбүлүкэҕэ цифровой араадьыйаны аҕаларга үлэлэһиэхпит диэн инники былаанын үллэһиннэ. Fm долгунтан уратыта диэн, бу араадьыйа быдан киэҥ сиргэ иһиллэр буолуоҕа диэтэ.
“Биһиги өрөспүүбүлүкэбит уйаара-кэйээрэ суох киэҥ сиригэр-уотугар тайаан сытар нэһилиэнньэлээх пууннарга түргэн интэриниэт ситимин тардыыга үгүс күчүмэҕэйдэр бааллар. Ол да буоллар, министиэристибэ ылыммыт соруктарын ыһыктыбат. Экэниэмикэҕэ төһө да барса суоҕун иһин, чааһынай инвестордары булаттаан, үбү-харчыны сөптөөхтүк тыыран, Саха өрөспүүбүлүкэтин бүтүннүүтүн аныгы түргэн тэтимнээх сибээскэ холбуохпут диэн эрэнэбин», — диэн Анатолий Семенов түмүктээтэ.
Ирина Ханды, “Саха сирэ” хаһыат, edersaas.ru