Сүрүн Үөрэх уонна наука

Арктика учууталларын олорор дьиэнэн, бырайыаһынан хааччыйыахтара

Саха сиригэр учууталларга олорор дьиэ сэртипикээтин биэрии саҕаланна. Бу туһунан өрөспүүбүлүкэ үөрэххэ уона наукаҕа миниистирэ Михаил Сивцев иһитиннэрдэ, диэтэ СИА.

“Бу үөрүүлээх сонун. Арктика оройуоннарыгар үлэлии барар учууталлары өйөөрү өрөспүүбүлүкэ бырабыыталыстыбата көҕүлээтэ. Онно үлэлии барар киһи чопчу болдьоххо дуогабардаһан, биир хостоох кыбартыыра сыанатын кыттыгас үбүлээһиҥҥэ сэртипикээт ылар”, — диэтэ Михаил Сивцев.

Миниистир былырыын “Арктика учуутала” бырайыак киирбитин эттэ. Ол быһыытынан хоту оройуоннарга үлэлии барааччылар айаннарын төлөбүрүгэр, таһаҕастарын илдьиигэ толуйуу уонна үс акылаат кэриҥнээх “подъемнай” ылаллар.

“Бу дьоһун өйөбүлүнэн былырыын 95 киһи туһаммыта. Быйыл үлэ салҕаныаҕа, хайы-үйэ 75 киһи бу миэрэнэн туһанар баҕалааҕын биллэрдэ”, — диэтэ кини.

Санаттахха, 2021 сылга Саха сирин 13 Арктикатааҕы уонна хоту оройуонуттан 450-ча педагог “Арктика учуутала” эрэгийиэн бырайыагынан идэлэрин үрдэтиэхтэрэ. Арктика түөлбэтигэр 95 оскуолаҕа 10 тыһ. тахса оҕо үөрэнэр, 1,9 тыһ. педагог үлэлиир. Бырайыак көмөтүнэн үөрэх уокуруктара тэриллэр, олимпиадалар ыытыллаллар. Хас биирдии уокурукка өрөспүүбүлүкэ биир педагогическай кэллиэһэ сыстар.

Сахаговтан

Бэлэмнээтэ Женни Стрюкова

Хаартыска: тустаах саайтан

 

0
0