РФ Бырабыыталыстыбатын бэрэссэдээтээлэ Михаил Мишустин Арктическай сэбиэккэ 2021–2023 сылларга Арассыыйа сүрүннүүр салалтатын туһунан тосхолу уонна онно анаммыт тэрээһиннэри бигэргэттэ.
Суолталаах докумуон Арктическай эрэгийиэн сайдыытыгар туһуланар. Арассыыйа Арктика сайдыытын сүрүннүүр үлэни дойдулар икки ардыларыгар бииргэ үлэлээһиҥҥэ түөрт хайысхалаах үлэни ыытарга былаанныыр. Ол курдук, Арктика нэһилиэнньэтэ (аҕыйах ахсааннаах хотугу норуоттары киллэрэн туран), тулалыыр эйгэни харыстааһын (килиимэт уларыйыытын киллэрэн туран), эрэгийиэн социальнай-экэнэмиичэскэй сайдыыта уонна Арктическай сэбиэт оруолун үрдэтии боппуруостарын тула кэскиллээх үлэ ыытыллыаҕа.
Арктическай сэбиэт 1996 с. тэриллибитэ. Бу дойдулар бырабыыталыстыбаларын истэринэн бииргэ үлэлээһини сүрүннүүр тэрилтэ. Сэбиэккэ Арассыыйа, Дания, Исландия, Канада, Норвегия, АХШ, Финляндия уонна Швеция киирэллэр.
РФ Бырабыыталыстыбатын салайааччыта бигэргэппит Арктическай сэбиэт тосхоло РФ Бэрэсидьиэнэ Владимир Путин 2035 сылга диэри бигэргэппит Арассыыйаҕа Арктическай зонаны сайыннарыы стратегиятын уонна национальнай куттал суох буолуутун судаарыстыбаннай бэлиитикэтигэр олоҕуран олоххо киириэҕэ. Уһук Илин уокурук салайааччыта Юрий Трутнев бу докумуон дойдулар икки ардыларыгар бииргэ үлэлээһиннэригэр улахан суолталааҕын ыйда. Манан сибээстээн, 2021 — 2023 сылларга «Арктика — санаа атастастаһыытын территорията» диэн норуоттар икки ардыларынааҕы пуорум ыытыллара былааннанар. Маны таһынан, араас кэмпириэнсийэлэр, кэнгириэстэр, эспэдьииссийэлэр уо.д.а тэрээһиннэр Дьокуускайга, Салехардка, Мурманскайга, Сыктывкарга, Архангельскайга уонна Норвегия хоту өттүгэр буолуохтара. Арассыыйаҕа Мурманскай уобаласка
«Териберка» уонна «Баренц көтөрө» бэстибээллэр, Саха сиригэр «Хотугу норуоттар куукуналара», Киинэ уонна норуот уус-уран оҥоһуктарын бэстибээллэрэ ыытыллыахтара. Маныаха эбии «Арктика оҕолоро», килиимэт уларыйыыта, туризмы сайыннарыы курдук сүрүн боппуруостар болҕомто киинигэр буолуохтара.
Елена ПОТОЦКАЯ, «Саха сирэ» хаһыат, edersaas.ru