Арктика сайдыытыгар туһуламмыт кэмпириэнсийэ саҕаланна

Бөлөххө киир:

Ыам ыйын 23-25 күннэригэр Дьокуускайга “Арктика – сайдыы сирэ” диэн нэһилиэнньэлээх пууннары тупсаран оҥорууга улахан кэмпириэнсийэ  ыытыллар. Бу кэмпириэнсийэ Арктика сэбиэтигэр Арассыыйа бэрэссэдээтэллээн олорор кэмигэр ыытыллыахтаах биир сүрүн тэрээһининэн буолар.

Санатан эттэххэ, Арктика сэбиэтигэр Арассыыйа былырыыҥҥыттан бэрэссэдээтэллээн олорор. 2023 сылга диэри бу чэрчитинэн дойдубут үрдүнэн араас тиэмэҕэ тэрээһиннэр былааннанан тураллар. Олортон биирдэстэринэн Арктика куораттарын тупсаран оҥорууга кэмпириэнсийэни ыытыы буолар.

Уһук Илин уонна Арктика сайдыытын корпорациятын салайааччыта Иван Печорин иһитиннэрэринэн, Саха сирин салалтата нэһилиэнньэлээх пууннары тупсаран оҥорууга ураты болҕомтотун уурар. Кини этэринэн, бу конференцияҕа экспертэр хоту дойду усулуобуйатыгар куораттары тупсаран оҥоруу, суол-иис, тырааныспар бары көрүҥүн сайыннарыы боппуруостарын көрүөхтэрэ. Ону таһынан куораттар маастар-былааннарын ырытыыга таһаарыахтара.

Манна даҕатан эттэххэ, Дьокуускай куорат маастар-былаанын оҥорууга Ил Дархан Айсен Николаев Арассыыйатааҕы куонкуруһу биллэрэн турар. Кыттааччылар бэс ыйын 28 күнүгэр диэри былааннарын оҥорон бүтэриэхтээхтэр. Бастыҥ бырайыактары аны күһүн балаҕан ыйыгар Илиҥҥи экономическай форумҥа РФ бэрэсидьиэнигэр Владимир Путиҥҥа билиһиннэриэхтэрэ.

Бастакы вице-премьер Кирилл Бычков бэлиэтииринэн, маннык кэпсэтиилэр Арктика, хотугу дойду сайдыытыгар төһүү буолаллар. Тэрээһиҥҥэ Арассыыйа туһааннаах министиэристибэлэрэ, биэдэмистибэлэрэ, улахан хампаанньалар, ону таһынан атын эрэгийиэннэр бэрэстэбиитэллэрэ, экспертэрэ эмиэ кытталлар. Онон конференция атын эрэгийиэннэр уопуттарын үллэстиигэ табыгастаах былаһаакка.

– Биһиги өрөспүүбүлүкэбитигэр куораттар маастар-былааннарын оҥоруу өссө 2020 сылтан саҕаламмыта. Быйыл Дьокуускай куорат былаанын таһынан Нерюнгри былаана оҥоһуллуохтаах. Стратегическай суолталаах докумуоннары оҥорууга, бастатан туран, дьон-сэргэ олорор усулуобуйатын тупсарыыны көрүү буолар. Манна даҕатан эттэххэ, билигин Арктика оройуоннарыттан Өлөөҥҥө, Чокурдаахха, Тиксиигэ маастар-былааннар оҥоһуллан тураллар. Бу бөһүөлэктэр тас көстүүлэрэ туох баар айылҕа уларыйыытыгар, усулуобуйатыгар, олохтоох дьон култуураларыгар олоҕуран, учуоттаныллан оҥоһулунна. Онон, мин санаабар, Арктика, хоту дойду сайдыыта бүтүн Арассыыйа сайдыытыгар төһүү буолуоҕа, – диэн бэлиэтиир кини.

Конференция кэмигэр биир сүрүн боппуруоһунан хоту дойдуга туризм сайдыытын көрүөхтэрэ. Ону таһынан эдэр исписэлиистэри бэлэмнээһиҥҥэ, олохтоох норуоттар култуураларын сайыннарыыга, о.д.а. боппуруостарга кэпсэтиилэр буолуохтара.

Аграфена КУЗЬМИНА,

Мария ВАСИЛЬЕВА (СИА) түһэриитэ.

+1
0
+1
0
+1
0
+1
0
+1
0
+1
0
+1
0