Арктика резиденнэрэ төрүт норуоттарга эппиэтинэстэрин ирдэбилэ күүһүгэр киирдэ

Арктикаҕа олорор аҕыйах ахсааннаах төрүт норуоттарга сыһыан хайдах буолуохтааҕый? Саҥа стандарт киирбит.

Арассыыйа Федерациятын Арктика түөлбэтин резиденнэрин дойду аҕыйах ахсааннаах төрүт норуоттарын кытта сыһыаннаһыыларыгар  саҥа ирдэбилэ Арассыыйа Илиҥҥи сайдыытын министиэристибэтин бирикээһинэн бигэргэннэ уонна күүһүгэр киирдэ. Билигин хампаанньалар төрүт олохтоох норуоттарга хайдах сыһыаннаһыыларыгар кодекс тутуһуллуохтаах.

Кодекс Арктика түөлбэтин уопсастыбаннай сэбиэтин, Арассыыйа ФАДН, Арктика эрэгийиэннэрин, Хоту дойду, Сибиир уонна Уһук Илин аҕыйах ахсааннаах төрүт норуоттарын ассоциациялара кыттыылаах торумнанна.

“Стандарт Арассыыйа Федерациятын Хоту дойду, Сибиир уонна Уһук илин аҕыйах ахсааннаах төрүт норуоттарын кытта  сыһыаннаһыы бириинсиптэрин кэрискэлэрин бигэргэтэр. Онуоха бу норуоттар интэриэстэрин сири-уоту баһылааһыҥҥа уонна хаһаайыстыбананй үлэни ыытыыга учуоттуохтаахтар. Стандарт төһө да сүбэлиир көрүҥнээх буоллар, хампаанньалар маны ирдэнэр усулуобуйа курдук тутуһалларыгар эрэнэбит”, — диэн стандарты бигэргэтиини РФ сенатора — ЯНАУо Сокуону оҥорор мунньаҕын бэрэстэбиитэлэ, Арассыыйа Федерациятын Хоту дойду, Сибиир уонна Уһук Илин аҕыйах ахсааннаах төрүт норуоттарын ассоциациятын бэрэсидьиэнэ Григорий Ледков эттэ.

Бу бириинсиптэргэ туох киирэрий:

— аҕыйах ахсааннаах норуоттар тирэхтээхтик сайдыыларыгар көмөлөһүү, олохторун уйгутун үрдэтии;

— бу аҕыйах ахсааннаах төрүт норуоттар түөлбэлээн олорор сирдэригэр айылҕа баайын баһылааһыҥҥа уонна үлэни ыытыы боппуруостарын быһаарыыга  кинилэри кытыннарыы;

— олохторун-дьаһахтарын тупсарыыга бииргэ үлэлээһин;

— Арктика түөлбэтин резиденин үлэтэ аһаҕас буолуохтаах;

— Арктика түөлбэтигэр үлэлэри ыытыыларыгар куһаҕан дьайыыта суох буолуохтаах.

Билигин аҕыйах ахсааннаах төрүт норуоттар ахсааннара 102000 киһиэхэ тэҥнэһэр, итиннэ 19 норуот киирсэр.

Билиҥҥи туругунан Арктика түөлбэтин резиденнэрин кытта 38 сөбүлэһии түһэрсиллибит. Инвестордар 178,5 млрд тахса солкуобай суумалаах бырайыактары олоххо киллэриэхтэрэ уонна 4380 киһини үлэҕэ ылыахтара.

Сахагов саайтан

Женни  Стрюкова бэлэмнээтэ

Хаартыска: тустаах саайтан