Арктика оройуоннарын аһынан-үөлүнэн хааччыйыы улаатар, кэҥиир, сайдар

Дьокуускайга «Якутопторг» баазатыгар кууһунан тарҕатар, үллэрэр саҥа киин баар буолла. Арктика оройуоннарыгар анаан 4,4 тыһ. кв. м иэннээх сиргэ социальнай суолталаах табаар арааһа манна хараллыа диэн этиллэр.

«Арктическай оройуоннарга барыларыгар кууһунан уонна биирдиилээн атыылыырга инфраструктура тэриллиэхтээх. Бу хас биирдии уустук суоллаах-иистээх нэһилиэнньэлээх пууҥҥа аһы-үөлү, наадалаах малы-салы тиэрдэргэ оҥоһуллубут тиһиктээх ситим. Онон бу саҥа киин аһыллыбыта, туруоруммут сыалбытыгар өссө биир хардыыны оҥоруубутунан буолар«, — диэн этэр Ил Дархан Айсен Николаев.

Киин 500 туоннаҕа тиийэ аһы-үөлү хаһаанар улахан баазаҕа тэрилиннэ. Уларытан оҥоруу уонна саҥатытан биэрии үлэлэрэ түһүмэхтэринэн 2020 сылтан саҕаламмыттар. Манна 3000 туоннаҕа тиийэ хортуоппуйу хаһаанар сир баар, 75 туоннаҕа тиийэ оҕуруот аһын, фруктаны уурарга анал сөрүүн камералар, 140 туоннаҕа тиийэ луугу хаһаанар сир, түргэнник буорту буолар аһы-үөлү уурар туспа камералар бааллар. Дьокуускай олохтоохторо мантан кууһунан уонна биирдиилээн атыылаһар кыахтаахтар.

Өрөспүүбүлүкэ премьерэ Александр Тарасенко аһы-үөлү тиэйии үлэтэ салҕанарын этэр. АН-2 салгын аалынан таһыы уустук суоллаах-иистээх нэһилиэнньэлээх аҕыс оройуоҥҥа: Усуйаанаҕа, Эбээн Бытантайга, Дьааҥыга, Абыйга, Аллайыахаҕа, Муомаҕа, Аллараа Халымаҕа уонна Орто Халымаҕа былааннанар. Бэс ыйыттан уу суолунан таһаҕас тиэйиллибитинэн барыахтаах. Маныаха тимир суолунан тиэйиини кытары тэҥнээтэххэ, ороскуот биллэ кыччыыра ыйыллар. Арктика оройуоннарыгар уонна хоту, оччотугар, ас-үөл сыанатыгар дьайыа диэн этэллэр.

Санатар буоллахха, Арктика оройуоннарыгар аска-үөлгэ сыананы тутар инниттэн СӨ Ил Дархана Айсен Николаев сорудаҕынан «Якутопторг» атыы-эргиэн логистика кииннэрэ арыллаллар. Маннык кииннэр 2021 сылга Абый уонна Усуйаана оройуоннарыгар баар буолбуттара. 2022 сылга сүрүн сорук быһыытынан кииннэр Дьааҥыга, Орто Халымаҕа, Эдьигээҥҥэ, Аллараа Халымаҕа былааннаналлар.

Онтон 2025 сылга диэри эргиэн-логистика кииннэрэ Арктика 13 оройуонугар баар буолуохтара. Манна даҕатан эттэххэ, уу суолун уонна дьоҕус авиацияны туһанан аһы-үөлү тиэрдии саҥа схемата үлэлиир. Ол түмүгэр кэнники сылларга аан бастаан “күөх рейстэр” ахсааннара икки төгүл улааппыта бэлиэтэнэн турар.

Хаартыскаларга Андрей Сорокин (СИА) түһэриилэрэ