Арктика оройуоннарыгар 15 туонна фруктаны тиэрдиэхтэрэ

Маны сэргэ, сымыыт, халбаһы, үүт астар, оҕо аһылыга уонна минньигэс арааһа баар буолуоҕа диэн «Якутопторг» пресс-сулууспата иһитиннэрэр.

«Хоту  оройуоннарга ыытарга 15 туонна фрукта атыылаһылынна. Манна яблоколар, апельсиннар, мандариннар, ананастар, о.д.а. элбэх«, — диэн этиллэр.

Арктика оройуоннарыгар сыл бүтүөр диэри уопсайа 95 туоннаттан тахса ас-үөл салгын аалынан уонна кыһыҥҥы суолунан тиэрдиллиэхтээх.

СӨ Ил Дархана Айсен Николаев сорудаҕынан, Арктика оройуоннарыгар аска-үөлгэ сыананы тутар туһуттан «Якутопторг» эргиэн-логистика кииннэрэ аһыллаллар.

Быйыл маннык кииннэр Абыйга уонна Усуйаанаҕа баар буоллулар. 2022 сылга Дьааҥыга, Орто Халымаҕа, Аллараа Халымаҕа тутуллаллара былааннанар.