Үүнэр сылтан Арктика 13 улуустарын бары олохтоохторо Дьокуускайга диэри уонна төттөрү көтөргө субсидиялаах билиэттэринэн туһанар кыахтаныахтара.
Бу иннинэ субсидиялаах билиэттэринэн 23-гэр диэри саастаах ыччат уонна 55-тэн үөһэ саастаах дьон муус устар 1 күнүттэн алтынньы 31 күнүгэр диэри эрэ көтөр кыахтаах этилэр. 2022 сылтан Уһук Хоту сытар 13 улуус олохтоохторо бары, саастарыттан тутулуга суох, көтөр кыахтаныахтара диэн Тырааныспар миниистирэ Владимир Сивцев иһитиннэрдэ.
Бу тыйыс усулуобуйалаах хоту дойду олохтоохторугар улахан үөрүүлээх сонун. Билиэт сыаната ыараханын бары билэбит. Эһиилгиттэн сырыыны-айаны чэпчэтэргэ анаммыт үбүлээһин үрдээн, эрэгийиэн иһинэн Арктика улуустарыгар чэпчэтиилээх бырагыраама үлэлиир кыахтаммыт.
Ол эрээри,чэпчэтиилээх билиэттэр Арктика улуустарыгар олорор уонна бырапыыскалаах эрэ дьоҥҥо атыыланыахтара. Ону тэҥэ, сөмөлүөт түһэр былаһааккаларын хааччыйарга уонна өрөмүөннүүргэ эмиэ субсидия көрүллүөҕэ. Онон пассажирдары таһыыга, санитарнай рейстэри оҥорууга хааччахтар суох буолуохтара.
Бу иннинэ Айсен Николаев 2022 сыл саҥатыттан Саха сирин олохтоохторугар Москваҕа уонна Санкт-Петербурга көтөр Уһук Илиннээҕи субсидиялаах билиэттэр атыыланыахтара диэн этэн турар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru