Арктика оройуоннарын олохтоохторо нолуоктан босхолонуохтара
Арктика оройуоннарын олохтоохторо Саха сирин баһылыга Айсен Николаев өрөспүүбүлүкэ бырабыыталыстыбатыгар физическэй сирэйдэргэ тырааныспар нолуогун, ону тэҥэ баайга-дуолга уонна сиргэ нолуогу суох гынар туһунан сокуон барылын бэлэмнииргэ сорудахтаабытын үөрэ иһиттилэр.
edersaas.ru
Айсен Николаев бэлиэтииринэн, ааспыт сылтан Арктика уонна тыа сирин урбаанньыттара нолуоктааһын судургутутуллубут тиһигэр саамай туһалаах нолуок режимигэр дьоһун көмөнү ылбыттара. “Сиринэн-уотунан тэҥнээн үллэрэр сыһыан тус аадырыстаах өйөбүлү үрдэтэр, оттон балаһыанньаны ырытан көрүү түмүгэр Арктика оройуоннарын олохтоохторо маннык көмөҕө наадыйаллара көстөр”, — диэн Ил Дархан бэлиэтээтэ.
Маныаха даҕатан эттэххэ, физическэй сирэйдэргэ сыһыаннаах нолуок преференциялара өрөспүүбүлүкэ Арктика биэс оройуонугар эрэ буолбакка, Саха сирин хотугулуу-Арктикатааҕы зонатыгар киирсэр аҕыс оройуоҥҥа эмиэ тарҕаныаҕа.
Онон тырааныспар, баай-дуол уонна сир нолуогуттан өрөспүүбүлүкэ 13 оройуона босхолонуоҕа: Абый, Анаабыр, Аллайыаха, Булуҥ, Үөһээ Халыма, Дьааҥы, Эдьигээн, Муома, Аллараа Халыма, Өлөөн, Орто Халыма, Усуйаана уонна Эбээн Бытантай.
Өрөспүүбүлүкэ Үпкэ министиэристибэтиттэн иһитиннэрбиттэринэн, физическэй сирэйдэри нолуок үс көрүҥүттэн босхолооһуҥҥа олоҕурбут Арктика улуустарын олохтоох бүддьүөттэрин ситэ ылбатах дохуоттарын барыллаан сыаналааһын 6-7 мөл. кэриҥэ солкуобайга тэҥнэһэр. Сокуон барылын олоххо киллэрдэххэ, өрөспүүбүлүкэ судаарыстыбаннай бүддьүөтүн түһэр дохуоттарыттан барыллааһын сыанабыла 30 мөл. солкуобайга тэҥнэһэр.
СӨ Арктиканы сайыннарыыга миниистирэ Александр Саввинов бэлиэтииринэн, Арктика бөлөҕүн сайыннарыы тутаах ирдэбиллэринэн Киһи хапытаалын өйөөһүн уонна сайыннарыы барар. “Арктика олохтоохторо айылҕа уонна суол-иис уустук усулуобуйатыгар , өрөспүүбүлүкэ кииниттэн тэйиччи олороллорунан, Саха сирин Ил Дархана Айсен Николаев сорудаҕынан нолуогу төлөөһүнтэн босхолооһун хоту дойду олохтоохторун олохторун усулуобуйатын чэпчэтиигэ сүҥкэн оруолу ылыаҕа. Сүрүннээн, бу күннэргэ Арктика инники дьылҕатыгар суолталаах докумуоннар ылынылыннылар: Арассыыйа Бэрэсидьиэнэ Владимир Путин 2035 сылга диэри Арассыыйа Арктикатааҕы зонатын сайыннарыы стратегиятын оҥороллоругар сорудахтаата. Ол аата Арктика хаалыылаах бириинсибинэн олорбокко, дойду бүттүүнүгэр регионнааҕы бэлиитикэ хайысхаларыгар саамай тумус суолталааҕынан буолуоҕа”, — диэн эрэнэр Александр Саввинов.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска интэриниэттэн