Людмила Колесова, “Путь развития” хаһыат уопсастыбаннай кэрэспэдьиэнэ:
edersaas.ru
— Бүгүн төһө да ыраах олордорбут өрөспүүбүлүкэбит Ил Дархана Айсен Николаев таһаарбыт саҥа ыйааҕын туһунан сонургуу иһиттибит. Олох саамай кэмигэр тахсыбыт ыйаах быһыытынан тус бэйэм сыаналыыбын. Арктикаҕа дьон-сэргэ олоҕо сайдыахтаах, тупсуохтаах. Ону бу Ыйаах салайан биэриэҕэ дии саныыбын.
Биһиги саамай кытыы Бөрөлөөх нэһилиэгэр олоробут. Сүрүн кыһалҕабыт суол-иис боппуруоһа буолар. Сайыҥҥы кэмҥэ Дьолоон үрэхпит уута түстэҕинэ, мотуордаах оҥочобутун соһо сылдьарга күһэллэбит. Аны туран төһө да биэлсэр пууннаах эрээрибит, каадыр суоҕуттан эрэйи көрөбүт. Онон биэлсэр кэлэн үлэлиирин кэтэһэбит аҕай. Ол иһин этэбин, тустаах ыйаахха олоҕуран бастаан кытыы нэһилиэктэри сайыннарыахха диэн.
Арктика социальнай-экэнэмиичэскэй сайдыытыгар туһуламмыт ыйааҕы тустаах министиэристибэлэр иҥэн-тоҥон, ымпыктаан-чымпыктаан үөрэтэн, Арктика хас биирдии нэһилиэгин кыһалҕатын туоратыыга чопчу былааннаах үлэлиэхтээхтэр. Оччоҕо эрэ докумуон дьиҥнээхтик үлэлээн, манна олохтоох дьон олоҕо-дьаһаҕа, үлэтэ-хамнаһа тупсуоҕа.
Бэлэмнээтэ Женни СТРЮКОВА
Хаартыска: Л.Колесова (архыып)