Арктика исписэлиистэригэр көҕүлүүр төлөбүрү оҥорорго этии киллэрдилэр
Кулун тутар 2-3 күннэригэр Москваҕа «Арктика: туруктаах сайдыы» норуоттар икки ардыларынааҕы VII кэмпэриэнсийэ кыттыылаахтара Арктика оройуоннарыгар үлэҕэ ылыллар дьоҥҥо анал надбавкалары олохтооһун боппуруостарын кэпсэттилэр.
Саха сирэ, үгэс курдук, улахан болҕомтотун Арктика социальнай-экэнэмиичэскэй, чуолаан киһи хапытаалын, сайдыытыгар уурар.
Эрэгийиэн баһылыга Айсен Николаев этэринэн, Арктикаҕа дьон тупсаҕайдык олороругар уонна идэтигэр таһымын олоххо туһанарыгар сөптөөх усулуобуйаны оҥоруохха наада. Оннук усулуобуйата суох сири-уоту салҕыы баһылааһын кыаллыбат. Бу ордук Саха сиригэр сыһыаннаах (Саха сирин аҥаара Арктика зонатыгар киирэр). Онон, бу сир-уот эдэр исписэлиистэр тардыһар, үрдүк таһымнаах каадырдар кэлэр кииннэринэн буолуохтаах.
Үлэҕэ күргүөмү үрдэтэргэ уонна Арктика оройуоннарыгар исписэлиистэри тардарга этиилэри М.К.Аммосов аатынан ХИФУ үөрэх чааһыгар проректора Алексей Голиков пленарнай сиэссийэҕэ оҥордо. Кини эппит миэрэлэригэр Арктика оройуоннарыгар экэниэмикэ дьоһун суолталаах салааларыгар исписэлиистэргэ үс бастакы сылларыгар хамнастарыгар надбавка быһыытынан көҕүлүүр төлөбүрү биэрии, Арктикаҕа уопсай үөрэхтээһин оскуолаларын базаларыгар профориентация кииннэрин үлэлэтии, Арктика сиригэр-уотугар эдэр исписэлиистэри өйүүр бырагыраамалары оҥоруу уонна үөрэнэр дьоҥҥо тус сыаллаах миэстэлэри элбэтии боппуруостара бааллар.
Надежда ЕГОРОВА, «Саха сирэ», edersaas.ru