Арктикатааҕы институт ректора үөрэх кыһатын туһунан кэпсээтэ (ВИДЕО)
Арктикатааҕы култуура уонна искусство судаарыстыбаннай институтун ректора, педагогика билимин хандьыдаата Саргылана Игнатьева «Инстаграмынан» быһа сибээскэ тахсан, институт туһунан кэпсээтэ, абитуриеннар ыйытыыларыгар хоруйдаата.
Санатан эттэххэ, икки нэдиэлэ устата институт бары кафедралара быһа сибээһинэн үөрэххэ туттарсааччыларга, тустаах үөрэх кыһатын сэҥээрээччилэргэ быйыл үөрэххэ туттарсыыга туох уларыйыылар киирбиттэрин, аһыллар идэлэр тустарынан кэпсээбиттэрэ.
Онон ректор быһа сибээһин кэмигэр икки нэдиэлэлээх тэрээһини түмүктээтэ. Институт олоҕун-дьаһаҕын, тугунан дьарыктарын, устудьуоннарга туох кыах бэриллэрин, тустаах үрдүк үөрэх кыһатын бүтэрбиттэр, идэлэр, устудьуоннар уопсайдарын туһунан сырдатта.
Идэлэр олоҕу кытта тэҥҥэ сайдан иһэллэр. Маныаха институт Саха сиригэр эрэ буолбакка, бүтүн Уһук Илин уокуругар аныгы олоххо сөп түбэһэр, култуура, искусство эйгэтигэр сыһыаннаах бары идэлэргэ бэлэмниир үөрэх киининэн буолар. Быйылгы сылга бакалавриат уонна специалитет 14 хайысхатыгар үөрэххэ ылаллар. Хаһааҥҥытааҕар даҕаны элбэх бүддьүөт миэстэтэ көрүллүбүт. Онон култуура, искусство салаатыгар туттарсыан баҕалаах эдэр дьоҥҥо улахан кыаҕы биэрэр.
Ректоры кытта быһа сибээһи манна эбэтэр институт «Инстаграмыгар» @agiki.ru киирэн көрүөххүтүн сөп.
https://www.instagram.com/tv/B_mPJA9o_D7/?igshid=39b0156sdfdo
Людмила ПОПОВА, «Саха сирэ» хаһыат, edersaas.ru