Арктикаҕа уонна хотугу сиргэ куттала суох аһылык тиэмэтинэн Билим кыһыҥҥы оскуолата ыытылынна
Арктикатааҕы судаарыстыбаннай агротехнологическай университекка Арктикаҕа уонна хотугу сиргэ куттала суох аһылык тиэмэтинэн Билим кыһыҥҥы оскуолата буолан ааста.
“Тустаах тиэмэ талыллыбыта ылбычча буолбатах. Кэлин Арктика уонна хотугу сир олохтоохторо төрүт астарын уларыйыыта, консерваннаах, ароматизатордаах, араас эбиликтээх уонна кырааскалаах бородууктаны ордороллоро көстөр. Тустаах сир олохтоохторун доруобуйатыгар бу хайдах дьайарын кэтээн көрүөхтээхпит. Арктика олохтоохторун органическай бытаардыы бородууктатынан уонна экологическай өттүнэн ыраас бородууксуйанан хааччыйыы кыһалҕата билим уонна олоххо киллэрии көрүүтүнэн (практических аспектов) суолталаах”, — диэн Кыһыҥҥы оскуола салайааччыта Ирина Дранаева кэпсиир.
Дакылаатчыт-устудьуоннар бэйэлэрин бырайыактарын хамыыһыйаҕа билиһиннэрдилэр. Кэрэхсэбиллээҕэ диэн, университет устудьуоннарын эспиэртэргэ кэпсээбит үгүс бырайыактара олоххо киирбиттэр уонна аччыгый биисинэс эйгэтигэр дохуот киллэрэллэр.
Бу үлэлэр ортолоругар эспиэртэр хотугу дьиэ табатыгар бруцеллез эпизоотическай түгэннэрин үөрэтии, Саха сиригэр дулҕаттан биогумуһу оҥоруу, Саха сирин киин улуустарын пасекаларын мүөтүн хаачыстыбатын сыаналааһын тиэмэлэрин бэлиэтээтилэр. Өйдөөх вендинговай автоматынан күөх эбилик үүнээйини (микрозелень) олордуу тиэмэтэ бастыҥ бырайыак быһыытынан бэлиэтэннэ.
“Мин бырайыагым интэриэһинэйэ диэн, олоччу гидропоникаҕа олордуллар буолан, килиимэт усулуобуйатыттан тутулуга суох олоххо киириэн сөп. Маны таһынан, киһи доруобуйатыгар туһалаах күөх эбилик үүнээйини (микрозелень) түргэнник улаатыннарар”, — диэн информационнай систиэмэ уонна технология бөлөҕүн устудьуона Павел Степанов кэпсиир.
Арктикатааҕы судаарыстыбаннай агротехнологическай университет пресс-сулууспата.