Былырыын СӨ Ил Дархана Айсен Николаев Арктикаҕа анаан учууталлары бэлэмниир туһунан сорудахтаабыта. Быйылгы үөрэх үлэһиттэрин Атырдьах ыйынааҕы мунньаҕар туох хамсааһын тахсыбытын билиһиннэрдилэр.
СӨ үөрэҕин уонна наукатын миниистирин бастакы солбуйааччы Михаил Присяжнай “Арктика учуутала” бырайыак туһунан билиһиннэрдэ. Бырайыак 2024 сылы хабар итиэннэ Арктика улуустарын пелагогтарынан хааччыйыыга туһаайыллар. Түмүгэр 450 педагог үлэлии тиийиэхтээх. Манна төһө учууталга көмө көрүллүөхтээҕэ, биир кэмнээх төлөбүрү туһаныахтааҕа, истипиэндьийэ ананыахтааҕар тиийэ барыта ыйыллар. Ол түмүгэр, 9-с уонна 11-с кылаас кэнниттэн аттестат ылар оҕо ахсаана 2024 сылга 95,8 бырыһыантан намыһах буолуо суохтаах. Орто анал уонна үрдүк үөрэхтэргэ киирэр оҕо ахсаана 81 бырыһыаҥҥа тиийиэхтээх диэн соругу туруораллар.
“Арктика учуутала” бырайыак тэрээһинин иитинэн быйылгыттан педагогическай кылаастары арыйаллар. “Оҕолору эрдэттэн учуутал буолалларыгар хайысхаларын ыйан бэлэмниэхтээхпит. Өрөспүүбүлүкэ педагогическай кэллиэстэрэ педагогическай кылаастар (бөлөхтөр) балаһыанньаларын оҥордулар. СӨ Үөрэҕин уонна наукатын министиэристибэтин бирикээһинэн, оскуолалары кытта бииргэ үлэлэһиини олохтуур инниттэн, Саха сирин педагогическай кэллиэстэрин үөрэххэ Арктикатааҕы уокуруктарын тэрийдибит. Ол эбэтэр, “Колымо-Индигирский”, “Анабаро-Приленский”, “Янский” үөрэх арктикатааҕы уокуруктарын олохтоотубут. Итиэннэ Дьокуускайдааҕы педагогическай кэллиэһи, Бүлүүтээҕи профессиональнай педагогическай кэллиэһи, Намнааҕы педагогическай кэллиэһи сыһыардыбыт. Бу уокуруктар балаһыанньалара оҥоһуллуоҕа. Кэллиэстэр кыраттан саҕалаан бөлөхтөрү арыйарга, кэнэҕэс устудьуоннарын бэлэмнииргэ, идэ таһымын үрдэтиигэ тэҥҥэ үлэлэһиэхтээхтэр”, — диэн миниистири бастакы солбуйааччы эттэ.
Итини сэргэ, Михаил Присяжнай, Арктика улуустарын эдэр исписэлиистэригэр аадырыстаах көмө уонна учууталларыгар биир кэмнээх харчынан төлөбүр көрүллүүтүн туһунан СӨ Бырабыыталыстыбатын уурааҕын бырайыага оҥоһуллубутун иһитиннэрдэ. Онно олоҕуран, эдэр исписэлиистэргэ айан ороскуотун уйунуохтара уонна 250 тыһыынча солкуобай суумалаах биир кэмнээх харчынан төлөбүрү көрүөхтэрэ. Бырайыак быйылгыттан олоххо киирэр, үбүлээһинэ ыйыллан турар диэн эттэ.
Людмила ПОПОВА, “Саха сирэ” хаһыат, edersaas.ru