АГАТУ-га Арктикаҕа үлэлиир исписэлиистэри бэлэмнээһиҥҥэ анаммыт «төгүрүк остуол» ыытылынна.
Кэпсэтиигэ аан тылы эппит бастакы проректор Станислав Федоров АГАТУ 2017 сылтан Саха сиригэр, Хабаровскай, Магадан уобаластарыгар уонна Чукоткаҕа анаан Хотугу үгэс буолбут салаалар исписэлиистэрин үөрэтэрин кэпсээтэ.
Арктиканы сайыннарыыга уонна хотугу омуктар дьыалаларыгар миниистири бастакы солбуйааччы Михаил Погодаев билигин тыа хаһаайыстыбатыгар, чуолаан ыраах ыстаадаларга пилота суох көтөр аппарааттары туһаныы үксээбитинэн, бу аппараттары салайар оператордары эмиэ бэлэмнииргэ этии киллэрдэ. «Эдэр табаһыт» бырагыраамаҕа кубуотаны элбэтэр уонна бу бырагырааманы Арассыыйа үрдүнэн киллэрэр наадатын тоһоҕолоон бэлиэтээтэ.
Үөрэх уонна наука миниистирэ Михаил Сивцев болҕомтону агрооскуолалар ситимнэригэр туһаайда. Өрөспүүбүлүкэ үрдүнэн 27 улууска 91 агрооскуола баар. Быйылгыттан министиэристибэ АГАТУ-ны кытары агрооскуолалар үлэлэрин бигэргэтэллэрин уонна хайысхаларынан көрөн инфраструктураҕа тэхэньиичэскэй ирдэбил стандартын туруоралларын туһунан эттэ.
«Төгүрүк остуол» түмүгүнэн кэпсэтии кыттыылаахтара киллэриллибит этиилэри өйүүллэрин биллэрдилэр. Ону таһынан АГАТУ Хотугу үгэс буолбут салааларга кафедратын материальнай-тэхиньиичэскэй базатын хааччыйыыга үбүлээһини көрөргө аҕыйах ахсааннаах хотугу омуктар үгэс буолбут төрүт дьарыктарын өйөөһүн федеральнай судаарыстыбаннай бырагырааматыгар кыттары наадалааҕынан аахтылар.
Раиса Сибирякова.