Бу күннэргэ хотугу таһаҕаһы тиэйии саамай эппиэтинэстээх түһүмэҕэ – Арктическай навигация саҕаланна. Арктика оройуоннарыгар быйыл уу суолунан 325 тыһыынча туонна таһаҕас араас көрүҥүн тиэйии соруга турар.
Өрөспүүбүлүкэҕэ навигация саҕаланыаҕыттан былааннаммыт 1 075 тыһыынча туонна таһаҕас араас көрүҥүттэн, билиҥҥи туругунан 747 тыһыынча туонна тиэлиннэ. Мантан 574 тыһыынча туонната олохтоох миэстэлэринэн тиэрдилиннэ диэн Нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт пресс-сулууспата иһитиннэрдэ.
“Өлүөнэтээҕи холбоһуктаах пароходство” ПАУо Арктикаҕа 400 тыһыынча туонна уматыгы тиэрдиэхтээх.
Ааспыт нэдиэлэҕэ суудуналар ыраах айаҥҥа турунаары бэлэмнэнии үлэлэрэ ыытыллыбыттара. Ол курдук «Ленанефть-2030», «Ленанефть-2031», «Ленанефть-2054», «Ленанефть-2055», «Ленанефть-2063», «Ленанефть-2064» теплоходтарга иниспиэктэрскэй бэрэбиэркэлэр ыытыллыбыттарын туһунан пароходство пресс-сулууспата кэпсээтэ.
Быков Мыска билигин Хотугу муораҕа суолунан айаннаары «Ленанефть-2032», «Капитан Шандровскай» тахсаары кэтэһэн тураллар. Маны таһынан «Ленанефть-2030», «Ленанефть-2031», «Ленанефть-2055», «Ленанефть-2063», «Ленанефть-2064», «Капитан Бурковскай» хоту айаннаан иһэллэр.
От ыйын 20 күнүгэр «Капитан Бабичев» ледокол Пеледуйтан, оттон «Капитан Бородкин» Жатайтан айаннаатылар. Эмиэ урукку сылларга курдук, туһааннаах ледоколлар суудуналарга улахан көмө буолуохтара.
edersaas.ru