Ил Түмэҥҥэ Саха сирин Арктикатааҕы зонатын кэҥэтэр туһунан санааларын атастастылар
Ил Түмэн сис кэмитиэтин бэрэссэдээтэлэ Елена Голомарева ыам ыйын 14 күнүгэр Арктика оройуоннарын уонна Хоту дойду аҕыйах ахсаннаах төрүт норуоттарын ассоциациятын бэрэстэбиитэллэрин кытары көрүстэ.
Көрсүһүүгэ норуот дьокутааттара Василий Местников, Любовь Явловская, Феодосия Габышева, Иван Романов, Арктика миниистирин солбуйааччы Михаил Погодаев, төрүт норуоттар боломуочунайдара Лена Иванова кытыннылар. Елена Голомарева Арассыыйа Бэрэсидьиэнэ Владимир Путин Арктикаҕа киирэр улуустарга сыһыаннаах саҥа ыйааҕын устуоруйаҕа бэлиэ түгэнинэн ааттаата.
Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников ыйаах илии баттаныытын улахан кыайыынан ааҕар. Кини Саха сирин Ил Дархана Айсен Николаев этиитин холобурдаан: “Арктика – бу биһиги кэскилбит уонна төбөбүт ыарыыта”, — диэн туран Арктика сирин-уотун бырамыысыланнас баһылаатаҕына тахсар экология кыһалҕаларыгар тохтоото.
Дьокутаат Любовь Явловская Саха Өрөспүүбүлүкэтин билиҥҥи олоҕор-дьаһаҕар ыйаахха илии баттааһын бэлиэ түгэнинэн буоларын эттэ. “Бу докумуон дьиҥ олоххо туһаны аҕаларын туһугар үгүһү оҥоруохтаахпыт”, — диэтэ кини. Кини этэринэн, аныгы Арктика бырайыагын оҥоруохтаахпыт: “Түмсүүлээхтик үлэлээн, науканы сыһыаран, аныгы технологиялары туһаныахтаахпыт. Биһиги норуоппут онно улахан эрэллээх”.
Аҕыйах ахсааннаах төрүт норуоттар бырааптарыгар боломуочунай Лена Иванова Саха сирин бастакы Бэрэсидьиэнэ Михаил Николаев, өрөспүүбүлүкэ баһылыктара Егор Борисов уонна билиҥҥи Ил Дархан Айсен Николаев бу боппуруоһу туруорсууга уонна ылыннарыыга күүскэ үлэлээбиттэрин бэлиэтээтэ.
“Хара сарсыардаттан үгүс эҕэрдэни туттум. Ол иһигэр атын регионнартан – Чукоткаттан, Магадантан уонна да атыттартан”, — диэтэ Лена Иванова. Кини Ульяна Винокурова стратегическай балаһыанньатын өйөөтө: “Арктикаҕа киһи сүрүн хаһаайын буолар, ол иһин стратегия киһиэхэ, кини кыһалҕаларыгар туһуланыахтаах. Биһиги бүгүн модельнай штатнай тиһиги олоххо киллэриини дьүүллэһэбит. Холобур, Нелемнэйгэ Тэки Одулок аатынан аан дойдуга дьүкээгир соҕотох оскуолатын инники кэскилин туох күүтэрий? Алын сүһүөх оскуола буолаары турар. Онон үгүс үлэ күүтэр”.
Эбээн-Бытантай улууһун бэрэстэбиитэллэрэ кытыннылар. Эдуард Матвеев барыларыгар истиҥник махтанна.
Ил Түмэн наукаҕа, үөрэхтээһиҥҥэ, култуураҕа, сонуннары киэҥник тарҕатар сириэстибэлэргэ сис кэмитиэтин бэрэссэдээтэлэ Феодосия Габышева Арктика зонатыгар киирсибит Үөһээ Халыма улууһуттан кэллэ. “Елена Христофоровна мин үөрэх миниистиринэн олорон “Көс оскуола”, “Арктика учуутала”, “Арктика оҕолоро” бырайыагы үлэлэппиппин аҕынна. Көдьүүһү биэрбит бырайыактар салгыы федеральнай таһымҥа үлэлиэхтэрин баҕарабын”, — диэтэ дьокутаат.
Ассоциация вице-бэрэсидьиэнэ Вячеслав Шадрин Василий Роббек, Феодосий Донской Саха сирин Арктикатын сайыннарыыга ыыппыт үлэлэрин бэлиэтээтэ. “Бука барыгытын ыам ыйын 22 күнүгэр Арктика министиэристибэтэ ыытар “Арктичесикй вектор” кэмпириэнсийэҕэ ыҥырабын”, — диэтэ кини.
Норуот дьокутаата Иннокентий Романов сэбиэскэй кэмҥэ Арктика дьонугар кыһаллалларын, билигин бырамыысыланнай, байыаннай интэриэс баарын бэлиэтээтэ.
Арктика миниистирин солбуйааччы Михаил Погодаев Арктика аҕыс оройуона бу ыйаах тахсыбытыттан астыналларын бэлиэтээтэ. “Үгүс үлэ күүтэр, ол иһигэр бары нормативнай быраап аакталара уларыйыылара, чэпчэтиилэри көрүү”, — диэтэ миниистири солбуйааччы. Елена Голомарева өссө төгүл эҕэрдэлээн туран, таһаарыылаах үлэҕэ ыҥырда.
Ил Түмэн пресс-сулууспата.