СӨ үөрэҕин уонна наукатын миниистирин бастакы солбуйааччы, п.н.д. Феодосия Габышева өрөспүүбүлүкэ Киин бырайыактыыр кэмитиэтин мунньаҕар “Арктика оҕолоро” норуоттар икки ардыларынааҕы киин” бырайыагын билиһиннэрдэ. edersaas.ru
Ил Дархан Егор Борисов бэрэссэдээтэллээх мунньах кыттыылаахтара бырайыгы көҕүлээһини ылыннылар уонна олоххо киллэриллэрин бигэргэттилэр. Санатан эттэххэ, “Арктика оҕолоро” норуоттар икки ардыларынааҕы киини арыйыыны “Арассыыйа ийэлэрэ” Бүтүн Арассыыйатааҕы уопсастыбаннай хамсааһын Саха сиринээҕи салаата көҕүлээбитэ.
Быйыл бэс ыйыгар “СӨ айдарыылаах оҕолору булуу уонна өйөөһүн кэккэ миэрэлэрин туһунан”, “2016-2020 сс. Инники кэскил туһугар” диэн тус сыаллаах бырагыраамаҕа “Арктика оҕолоро” киин эбийиэктэрин тутууну үбүлээһини киллэрэр туһунан СӨ Ил Дарханын Ыйааҕа тахсыбыта.
Бу Арктика норуоттарын төрүт култуураларын, үгэстэрин, дьарыктарын харыстаан, ону науканы уонна тиэхиньикэни кытта дьүөрэлээн, инновационнай технологияны туһанар хайысхалаах хас даҕаны сыллаах култуурунай-үөрэтэр бырайыак буолар. Бу бырайыакка Арассыыйа арктическай эрэгийиэннэрэ, ону тэҥэ, Арктика чугаһынааҕы дойдулар – Дания (Гренландия), Исландия, Канада, Норвегия, АХШ, Швеция, Финляндия кытталлара биллэр. Тутуу 2020 сылга түмүктэниэхтээх.
Бырайыагы толорооччулартан биирдэстэрэ, “Саха сирин оҕолоро” өрөспүүбүлүкэтээҕи ресурснай киин дириэктэрэ, п.н.к. Мария Петрова: “Аныгы база тиийбэтэ, үөрэх инновационнай бырайыактарыгар кыттыыга хааччахтар Арктика эрэгийиэнигэр каадыры бэлэмнээһини, аныгы идэлэри баһылааһыны, оҕолор адаптацияларын бытаардар төрүөт буолаллар. Үрдүк технологиялаах тэрилинэн хааччыллыбыт аныгы “өйдөөх” дьиэлэр, үөрэх норуоттар икки ардыларынааҕы ирдэбилигэр эппиэттиир инфраструктура, кэлэр кэм идэлэрин кытта билиһиннэрэр оҕо тэхэньиичэскэй паарката, о.д.а. барыта биһиги оҕолорбут үөрэхтэрин таһымыгар уонна эрэгийиэн сайдыытыгар көмөлөһүөҕэ”, — диэн кэпсээтэ.
СӨ Үүнэр көлүөнэ тус сыаллаах фондатын генеральнай дириэктэрэ Сергей Местников: “Дуогабар быһыытынан “Якутбырайыак” бырайыак докумуонун туттарыахтаах итиэннэ эһиил алтынньы ыйга судаарыстыбаннай эспэртиисэни ааһыахтаах. “Арктика оҕолоро” норуоттар икки ардыларынааҕы киин маҥнайгы сыбаайалара эһиил түһүөхтэрэ. Тутуу 2020 сылга бүтүөҕэ”, — диэн иһитиннэрдэ.
Бэлиэтээн эттэххэ, “Арктика оҕолоро” бырайыак “Оҕолорго аналлаах тоҕоостоох эбии үөрэхтээһин” приоритетнай бырайыак сүрүн тэрээһиннэрин кэккэтигэр киирэр.
“Саха сирин оҕолоро” өрөспүүбүлүкэтээҕи ресурснай киин пресс-киинэ.