Маны аах Уопсастыба

“Арктика күнүн анныгар”. Семен Луканси саҥа быыстапката

Алтынньы 13 күнүгэр Нижнэй Новгородка биһиги биир дойдулаахпыт, эдэр талааннаах худуоһунньук Семен Луканси быыстапката арыллар.

“Эдэр, элбэҕи эрэннэрэр худуоһунньук айар үлэтэ кини төрөөбүт дойдутун – Саха Өрөспүүбүлүкэтин кытта ыкса ситимнээх. Хотугу сир тыытыллыбатах кэрэ айылҕата, дьонун-сэргэтин уобараһа, түҥ былыргыттан илдьэ кэлбит эпоһа Олоҥхо, этническэй орнаменнарын бэлиэлэрэ…   Маннык, норуот баай-талым култууратын дириҥник анааран көрдөрүү, бу кэрэни киһи аймахха бүттүүнүгэр тиийимтиэ, ураты тылын-өһүн дьоҥҥо барытыгар өйдөнүмтүө оҥорор дьикти күүстээх…

«Аҕам». х.м. 2020 с.

Быыстапка аата олус символичнай –полярнай түүннээх Арктика норуоттара, былыр-былыргыттан, бу олох салҕаныытын уонна норуот барҕарыытын бэлиэтэ — КҮҤҤЭ сүгүрүйэллэр…”, — диэн билиһиннэрэр Нижегородскайдааҕы быыстапкалыыр комплекска аһыллар быыстапка туһунан биир дойдулаахтарыгар искусствовед, филологическай наука кандидата, А.А.Пластов аатынан Айар ыччаты өйүүр пуонда бэрэсидьиэнэ  Татьяна Пластова.

«Хоту дойду» триптих уҥа чааһа. х.м. 2019 с.

Бу, Нижегородскайдааҕы судаарыстыбаннай быыстапкалыыр комплекс көҕүлээһининэн ыытыллар быыстапка РФ Бэрэсидьиэнигэр СӨ Бастайааннай бэрэстэбиитэлистибэтин уонна А.А.Пластов аатынан Айар ыччаты өйүүр пуонда өйөбүллэринэн тэриллэр.

Сахалыы натюрморт. х.м. 2020 с.

Быыстапкаҕа саха худуоһунньуга Семен Луканси бары жаанырдарга – монументальнай полиптихтан уонна станковай хартыыналартан камернай пейзажтарга, натюрмортарга тиийэ 80 живописнай үлэлэрэ көрдөрүллүөхтэрэ. Быыстапка түһүмэхтэрэ хотугу сир пейзажтарыгар, норуот мифологиятыгар, Аҕа дойду Улуу сэриитин тиэмэтигэр ананаллар. Ураты болҕомтону, мэтириэттэр сиэрийэлэрэ уонна үгэс буолбут киэргэл орнаменнардаах үлэлэр ылыахтара дииллэр исписэлиистэр.

Арассыыйа уонна саха норуодунай артыыһа Степанида Борисова мэтириэтэ. х.м. 2020 с.
С.Луканси.  Саха норуодунай суруйааччыта Д.К.Сивцев-Суорун Омоллоон мэтириэтэ. х.м. 2020 с.

Биллэрин курдук, Амматтан төрүттээх эдэр худуоһунньук, саха талааннаах графига, гравера Валериан Васильев аатынан  эдэр худуоһунньуктары өйүүр бириэмийэ лауреата Семен Луканси Москватааҕы В.И.Суриков аатынан художественнай институту (академик Ю.А. Шишков мастарыскыайа) кыһыл көмүс дипломунан бүтэрбитэ.

«Абакаяда». х.м. 2020 с.

Кини билигин Арассыыйа Художественнай  академиятын (РАХ) айар мастарыскыайдарыгар стажировканы бара сылдьар, академик А.П.Ткачев салалтатынан үлэлиир.

Сүрүн хаартыскаҕа: С.Луканси. «Оҕонньоттор». х.м. 2020 с.

 

Татьяна МАРКОВА.

 

4
0

Добавить комментарий