СӨ ОДьКХ уонна энэргиэтикэҕэ миниистирэ Вячеслав Емельянов иһитиннэрбитинэн, атырдьах ыйын 30 күнүнээҕи туругунан, Анаабыр, Аллайыаха, Абый, Булуҥ, Дьааҥы, Аллараа Халыма, Өлөөн, Кэбээйи, Муома, Орто Халыма, Аллараа Халыма улуустарыгар оттук сезона саҕаланан хочуолунайдар итиини биэрдилэр.
Миниистир быһаарбытынан бэрт сотору бары хоту улуустарга оттук сезона саҕаланыаҕа. Усуйаана улууһугар Депутатскайга итии бэриллибит. Бүгүн, атырдьах ыйын 31 күнүгэр, Үөһээ Халыма улууһугар итиинэн хааччыйар эбийиэктэр үлэлиэхтэрэ.
«Дьокуускайга оттук сезона балаҕан ыйын 1 күнүттэн саҕаланар, ити күн социальнай эбийиэктэргэ, оттон дьиэлэргэ балаҕан ыйын 5 күнүттэн сылаас бэриллиэҕэ. Өрөспүүбүлүкэ үрдүнэн оттук сезонугар бэлэмнэнии этэҥҥэ барар», — диэн миниистир Вячеслав Емельянов иһитиннэрдэ.