Халаан содулуттан эмсэҕэлээбиттэргэ көмөлөһөртөн ким да туора турбат. Дьиэлэрин-уоттарын, малларын-салларын ууга былдьаппыт дьоҥҥо күннээҕи сиир килиэби, туттар тэрили таһынан Айыы Тойон сулууспалаахтарын үтүө тыла, өйөбүлэ эмиэ наада.
Ол иһин, ыам ыйын 10 күнүгэр Ил Дарханы кытары көрсүһүүгэ Амма сэлиэнньэтин олохтоохторо Дьокуускай уонна Ленскэй архиепискоба Роман кэлэ сылдьарыгар баҕаларын эппиттэрэ. Егор Афанасьевич нэһилиэнньэ көрдөһүүтүн тиэрдэн, архиепископ Роман бу сарсыарда Аммаҕа тиийэ сырытта.
Бастатан туран, улуус баһылыга Николай Архиповы кытары көрүстэ, Аммаҕа киирэн, Эбэни сибэтии гынна. Итиэннэ Амма сэлиэнньэтигэр Албан аат болуоссатын таһыгар баар чосуобунаҕа Паасхаҕа анаммыт сулууспаны ыытта.
Улуус олохтоохторун уонна таҥараны итэҕэйээччилэри дьылҕа тургутар ыарахан кэмигэр түмсэргэ, сомоҕолоһорго ыҥырда. Сулууспа кэнниттэн олохтоохтортон уон улахан киһи, үс кыра оҕо таҥараҕа сүрэхтэннилэр.
Раиса СИБИРЯКОВА, «Саха сирэ» хаһыат, edersaas.ru