Arctic open киинэ марафонун чэрчитинэн, «Берегиня» диэн Поморскайдааҕы култуура пуондата Саха сирин режиссердарын киинэлэрин көрдөрөн эрэр.
Бу тэрээһин 2017 сылтан ыытыллар. Архангельскай уобаласка олунньуттан ыам ыйыгар диэри Arctic open киинэ бэстибээлигэр кыттар үлэлэри көрдөрөллөр. Онон марафонҥа кыттар уонна эрэгийиэннээҕи киинэ саалаларын өйүүр сыалтан муус устартан Саха сирин киинэтин күннэрэр ыытылла тураллар. Бүтэһик сылларга саха киинэтэ үгүс ситиһиилэммитэ дьон болҕмототун тарта.
Тэрээһин бырагырааматыгар 2016-2019 сылларга тахсыбыт толору метрдээх биэс киинэ киирдэ: «Кэрэл» мелодрама, «Агент.Мамбо» кэмиэдьийэ, «Мой убийца» детектив, «Республика Z» хоррор, «Хранители тундры» документальнай киинэ. Киинэлэргэ Хотугу флокка сулууспалыы сылдьааччылар, устудьуоннар сырыттылар.
«Киинэ марафонун тэрийии сүрүн соругунан көрөөччүлэри түмэн кэпсэтии таһаарыы, санаа үллэстиитэ буолар. Бу киинэлэр билиҥҥи кэмҥэ саамай тыҥааһыннаах, социальнай уонна сиэр-майгы кыһалҕаларын таарыйаллар», —диэн тэрийээччилэр санааларын үллэстэллэр.