Быйыл ардахтаах сыл буолан, халлааммыт оттотумаары гынна, оҕустахпыт аайы кэлэн түһэ турар дэһээччи элбэх. Ардах кэлэрин хайдах билиэххэ сөбүй?
— Эрбэһиҥҥэ, сэбирдэҕин төрдүнэн үрүҥ күүгэннэр тахсыбыт буоллахтарына, куйаас ыкпыт, сотору кэминэн ардах кэлэр
— кураан күннэр кэннилэриттэн, ардах саҥа түһэн эрдэҕинэ, этиҥ уһуннук сүүллэн эттэҕинэ ардах улаатар уонна уһуур
— этиҥнээх ардах иннигэр сахсырҕалар ампаар, дьиэ ойоҕоһугар, истиэнэтигэр түһэллэр
— ыҥырыа сайын ыраас күҥҥэ уйатыттан тахсыбакка бүктэҕинэ, сотору ардах кэлэр
— ынах ыам аайы ааннньа иэппэт буоллаҕына, соторунан ардах кэлэр
— ый эргэтинээҕи ардах, ый саҥатынааҕы ардаҕы кытта силбэстэҕинэ, былыт, ардах уһуннук турар
— ый дьиэтэ кэтит буоллаҕына, халыҥ, уһун сис былыт кэлэр
— ыаммытынан үүт аанньа үрүттэммэтэх буоллаҕына, соторунан ардах кэлэр. Ол салгын баттааһына үрдээн, үүт сүөгэйэ үөһэ дагдайбатыттан сибээстээх
— ардах чугаһаатаҕына чоппуускалар ийэлэрин таһыттан арахпаттар
— чаччыгыныар күүскэ айманар буоллаҕына, сотору ардах кэлэр
— халлаан оройугар эбир былыттар төттөрү-таары элбэхтик устар буоллахтарына, этиҥнээх ардах түһэрэ чугаһыыр
— тэтиҥ лабаата аллара санньыйбыт буоллаҕына, соторунан ардах кэлэр
— тыал, ардах кэлэригэр майаҕас балык сиһин уҥуоҕа токуруйан хаалар
— сордоҥ өрүс кытылыгар тахсыбатах, далайыгар тимирбит буоллаҕына, уһун ардах, тыал-куус кэлэр
— ардах чугаһаатаҕына, кумаар киһиэхэ түһэрэ элбиир
— долгун сүүрүгү утары уһуннаҕына, сотору ардах түһэр.
(И.Сосин, И.Неустроев “Сахалыы күнү-дьылы билгэлээһиннэр” кинигэттэн).
sakha-sire.ru саайтан.