“Быйыл 13 ыйдаах сыл. Маннык сыл үүнээйигэ уустук, ыарахан соҕус өттүктээх буолааччы. Онно эбии сайын ортото сөмөлүөтүнэн ытыалаан, халлаан сиигин дэлби алдьаттылар. Отуора хамнаабыт халлаан чөлүгэр бытааннык түһэр”, — диир агроном идэлээх тыа хаһаайыстыбатын бэтэрээнэ Юрий Петров.
Юрий Васильевич Тыа хаһаайыстыбатын министиэристибэтигэр үлэни наука көмөтүнэн тэрийэр исписэлииһинэн үлэлиир сылларыгар күнү-дьылы билгэлээһиҥҥэ куоталаһыы ыытылларын ахтар. Онно өссө биирдэ 20-чэ киһи кыттыбытыгар бастаабыттаах эбит. Кини сыл аайы оҕуруотчуттарга анаан ый халандаарын ырытан-таҥан оҥорор. “Ый эргиирин ааҕыы сахаҕа былыргыттан баар, өбүгэлэрбит билэллэр, олохторугар-дьаһахтарыгар туһаналлар этэ”, — диир уонна айылҕа хаамыытыгар, чуолаан, 13 ыйдаах сылга үлүбээй орооһор сэрэхтээҕин, уһун ардах от үлэтин атахтыаҕын, от хаачыстыбатыгар куһаҕаннык сабыдыаллыаҕын ыйар.
Кырдьык, былыт кэллэр эрэ саккырыы сылдьар буолан хаалла. Кырдьаҕас сабаҕалыырынан, ытанньах оҕолуу майгыламмыт халлаан атырдьах ыйын быһа ардаатаҕына даҕаны көҥүлэ. Маннык 13 ыйдаах сыл биэс сылга биирдэ-иккитэ кэлэн ааһар эбит. Юрий Васильевич уонтан тахса сыллааҕыта искусственнай ардаҕы курааны утары туһаныы куһаҕан сабыдыалламмытын санатар.
Василий НИКИФОРОВ, «Саха сирэ» хаһыат, edersaas.ru