Тохсунньу 1 күнүгэр Дьокуускай куоракка, Арчы дьиэтигэр сыл бастакы оһуохайа дуорайда.
Үүммүт 2017 сыл өрөспүүбүлүкэтээҕи “Оһуохай” уопсастыбаҕа бэлиэ сыл буолар. Ол курдук, бу 3 тыһыынча кэриҥэ чилиэннээх, 14 улууска филиаллаах Саха сирин саамай бастакы, “кырдьаҕас” уопсастыбаннай тэрилтэтэ быйыл 30 сааһын туолар.
Сыл бастакы оһуохайын Саха сирин Аар Дархан этээччитэ Анатолий Иванович Кривошапкин таһаарда. Итиэннэ бу күн 3 киһиэхэ “Саха сирин үтүөлээх оһуохай этээччитэ” үрдүк аат иҥэрилиннэ. Ол курдук Ньурбаттан эдэр этээччи Прокопий Федоровка, Дьокуускайтан Афанасий Степанович Архиповка уонна Дьааҥыттан төрүттээх Светлана Васильевна Сивцеваҕа.
— Оһуохайдьыттарбыт үүммүт саҥа сылы уруйдаан-айхаллаан, Саха сирин олохтоохторугар оһуохай тылынан алгыстарын тиэртилэр, дьоллоох, байылыат олоҕу баҕардылар, — диир “Оһуохай” уопсастыба бэрэссэдээтэлин көмөлөһөөччүтэ Александр Лаврентьевич Тарскай.
Татьяна Маркова.