Нам улууһун Арбын нэһилиэгэр Алдан өрүскэ уу таһыма түһэн эрэр. Ол туһунан нэһилиэнньэ олоҕор-дьаһаҕар куттала суох буолууну хааччыйар Судаарыстыбаннай кэмитиэт бэрэссэдээтэлин 1-кы солбуйааччы Иннокентий Андросов иһитиннэрдэ. Санатар буоллахха, ити эргин уу таһыма бэс ыйын 2 күнүттэн үрдээн, тута ыксаллаах быһыыга-майгыга бэлэмнэнии эрэсиимэ биллэриллибитэ. Салгыы бэс ыйын 6 күнүгэр уу таһыма кутталлаах кэрдииһи 16 см куоһаран, 913 см буолбутун түмүгэр, 24 тэлгэһэ былдьаммыта, 7 киһи аймахтарыгар көһөрүллүбүтэ. Ыксаллаах быһыы-майгы буоллаҕына, дьону олохтуур пуун тэриллибитэ. Сүөһүнү уу тахсыбат сиригэр-уотугар үүрбүттэрэ. Сууккаҕа тохтоло суох үлэлиир дьуһуурустуба олохтоммута.
Бүгүн уута таһыма 22 см түстэ. «Нам улууһун Арбын нэһилиэгин аттынан уу таһыма биллэрдик түһэ турар, суукка устата ол 22 см тэҥнэстэ. Бу күннэргэ 30 см диэри тиийиэҕэ. Уу таһыма кутталлаах кэрдиискэ оруобуна тиийдэ (897 см). Бу үчүгэй», — диэн Иннокентий Андросов быһаарар.
Өрөспүүбүлүкэ үрдүнэн балаһыанньа этэҥҥэ.