Саха сирин үөрэнээччилэрэ Арассыыйа иһинээҕи олимпиадаларга кыайдахтарына уонна миэстэлэстэхтэринэ харчынан бириэмийэлэниэхтэрэ. Кыайыылаахтар 500 тыһ. солк., призерадар 100 тыһ. солк. наҕараадаланыахтара диэн Ил Дархан Айсен Николаев Ыйааҕа таҕыста.
Докумуоҥҥа сурулларынан, төлөбүр үөрэххэ үрдүк ситиһиилэри көрдөрбүт үөрэнээччилэргэ ананар диэн. Наҕараада хас кыайыы, миэстэлэһии ахсын бэриллэр.
«Ситиһиилэринэн өрөспүүбүлүкэбитин үрдүктүк ааттатар үөрэнээччилэрбитин өйөөн, Арассыыйа иһинээҕи олимпиадалар кыайыылаахтарыгар уонна призердарыгар Саха сирин баһылыгын бириэмийэтин аныырга быһаарынным! Биһиги оҕолорбут — дойдубут инникилэрэ бэйэлэрин кыахтарын арыналларыгар үчүгэй саҕалааһыннаах буолуохтаахтар», — диэн Айсен Николаев эрдэ бэлиэтээн этэн турар.
Санатан суруйдахха, Саха сиригэр БКЭ-ни 100 баалга суруйбут үөрэнээччигэ 100 тыһ.солк. көрүллэр. Бу сылга маннык төлөбүрү 24 выпускник ылбыта.