Арассыыйатааҕы таһымнаах ыалдьыттар Олоҥхо ыһыаҕар үөрүүнү бэлэхтээтилэр
Олоҥхо ыһыаҕын саҕана Дьокуускайга аҕыйах ахсааннаах хотугу норуоттар Арассыыйатааҕы тэрээһиннэрэ ыытыллынна.
edersaas.ru
Саха сирин ыалдьыттара Намҥа ыытыллыбыт Олоҥхо ыһыаҕар чаҕылхай айар талааннарын көрдөрдүлэр.
Магадантан сылдьар Евгений Петров — устудьуоннар «Ерарто» үҥкүү ансаамбылларын солиһа.
Кини «Охотоморье» үҥкүүнү ис сүрэҕиттэн толорон, көрөөччүлэр биһирэбиллэрин ылла.
— Мин саха норуота национальнай бырааһынньыгын туһунан истэн билэбин. Ол эрээри, бу бырааһынньыкка тус бэйэҥ кыттыыны ыларыҥ олох атын эбит. Ыһыах аһыллыытын интэриэһиргээтим. Саха омук абыычайын көрдүм. Наһаа минньигэс национальнай бүлүүдэлэри амсаттылар. Ордук убаһа этин сөбүлээтим, — диэн санаатын үллэһиннэ айар куттаах эдэр киһи.
Оттон Алима Готову Бурятияттан кэлбит. «Гулувун» устудьуоннар үҥкүү ансаамбылларын солистката ыһыах туһунан санаата маннык:
— Мин омукпунан монголбун. Төрөөбүт дойдум — Бурятия. Саха сирин уруккуттан истэн билэбин. Саха дьоно бэйэлэрин өбүгэ саҕаттан илдьэ кэлбит төрүт үгэстэрин оҕо эрдэхтэриттэн билэ улааппыт Уһук Илиҥҥи эрэгийиэҥҥэ соҕотох норуот дии саныыбын. Мин бу этэрим сахалар национальнай быраһынньыктарыгар — Олоҥхо ыһыаҕар дьэҥкэтик көһүннэ.
Ити курдук, Хотугу сир, Сибиир уонна Уһук Илин эригийиэн этническэй култуурунай кииннэриттэн сылдьар Арассыыйатааҕы аҕыйах ахсааннаах норуоттар ыччаттара бэйэлэрин чаҕылхай талааннарын билиһиннэрэн, Олонхо ыһыаҕын ыалдьыттарыгар үөрүү сырдык кыымын бэлэхтээн аастылар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.