Саха сирин музейдара Арассыыйа устун куйаар ситиминэн айан бырайыагар ыҥыраллар.
Бу туһунан А.Е.Кулаковскай аатынан норуоттар доҕордоһууларын дьиэтэ саайтыгар суруйбут диэн sakha.gov.ru бэлиэтиир. «Элбэх национальностаах Арассыыйа устун куйаар ситиминэн» саҥа бырайыагы тэрилтэ национальнай сыһыаннаһыыларга эйгэтин ресурснай киинэ тэрийэр.
Бырайыакка национальнай музейдардаах этнокультурнай уопсастыбаннай түмсүүлэр кыттарга ыҥырыллыбыттар. Кинилэр экспозицияларын куйаар ситиминэн көрдөрүөхтээхтэр, музей хайдах тэриллибитин кэпсиэхтээхтэр, туох баарын сырдатыахтаахтар диэн быһаарыллыбыт. Маныаха онно анаан 10-15 мүнүүтэлээх видеороликтары устан баран, «Ресурсная среда» канаалга ierrc2017@gmail.com аадырыска ыытыҥ диэн ыйбыттар.
«Хас биирдии мал-сал ураты устуоруйалаах. Ол дириҥ устуоруйаны биһиги үллэстэргэ бэлэммит. Өскөтүн эһиги билигин да музейгыт суох буоллаҕына, ол эрээри элбэх былыргы мал-сал ууруллан хаалбыт буоллаҕына, бу эһиги музейданаргытыгар кыаҕы биэрэр» диэн иһитиннэриигэ суруллубут.
Маныаха тэрийээччилэр видеотуру устарга көмөлөһөргө бэлэмнэрин этэн туран, музейгыт туһунан үөһээ бэриллибит электроннай почтаҕа суруйан биллэрэргитигэр этэллэр.
Бастыҥ видеотурдар «Ресурсная среда» каналга туруоруллаллар уонна уопсай роликка киллэриллэн, куйаар ситиминэн турга кытталлар диэн этэллэр.
+1
+1
+1
+1
+1
+1
+1