Дойду бырабыыталыстыбатын бэрэссэдээтэлин солбуйааччы Дмитрий Чернышенко Арассыыйаҕа учуонай уопсай ахсааныттан 40 % дьахтар, аан дойдуга ити сыыппара 30 % тэҥнэһэр диэн эппит. Ити туһунан РФ Билимҥэ уонна үрдүк үөрэххэ министиэристибэтин саайтыгар суруллар.
“Күн бүгүн Арассыыйа билимигэр 134 тыһ. тахса дьахтар үлэлиир, итинтэн 60 тыһ. кэриҥэ 39-тан кыра саастаах. Олохторун бу салааны кытта сибээстиэн баҕалаах кыргыттар үксээн иһэллэрэ көстөр. Аспирантураны бүтэрбиттэртэн 48 % кэрэ аҥар, онтон ординатураны бүтэрбиттэртэн 60 %-тан тахсар. Бырабыыталыстыба эдэр учуонайдары өйүүр уонна ыччаты билимҥэ сыһыарар үлэтин салгыыр. Олоҕун чинчийэр үлэҕэ аныырга быһаарыммыт хас биирдии дьахтар талаанын арыйара суолталаах”, — диэн Дмитрий Чернышенко бэлиэтиир.
“Кыргыттар билимҥэ дабайыыларыгар эрэйдээх уонна уустук кэмнэр бааллара. Бүгүн Арассыыйаҕа 30 тыһ. тахса дьахтар кандидат уонна 7 тыһ. кэриҥэ билим дуоктара баар диэн киэн тутта этэбит. Дойду университеттарыгар 128 тыһ. кэрэ аҥар преподавателинэн үлэлиир. РФ Билимҥэ уонна үрдүк үөрэххэ министиэристибэтигэр киирэр 44 үрдүк үөрэҕи уонна 61 билим тэрилтэтин дьахтар салайар”, — диэн миниистир Валерий Фальков иһитиннэрэр.
Сиһилии РФ Билимҥэ уонна үрдүк үөрэххэ министиэристибэтин саайтыттан ааҕыаххытын сөп.
Хаартыска: СИА