Арассыыйа учуонайдара мэйиичээн ыарыылаах дьон олоҕун уһатарга үлэлииллэр
Альцгеймер ыарыыны эмтиир мемантин препарат мэйиичээн ыарыыларын эмтииргэ туһаныллыан сөп. Хотугулуу-Илиҥҥи федеральнай университет уонна Красноярскайдааҕы мэдиссиинискэй университет учуонайдара сабаҕалыылларынан, СЦА1 (спиноцеребеллярная атаксия 1 типа) ыарыылаах дьон олоҕо уһууругар бу препарат көмөлөһүөн сөп эбит.
СЦА1 диэн нейродегенеративнай бэргээн иһэр эмтэммэт удьуордуур ыарыы буолар. Маныаха киһи сүнньэ уонна мэйиитэ эчэйэр.
Бу препараты Арассыыйа учуонайдара Япония уонна Британия киэҥ билиилээхтэрин кытта үөрэтэллэр. Билиҥҥитэ кыылларга чинчийиини ыыта сылдьаллар. ХИФУ молекулярнай мэдиссиинэҕэ уонна киһи генетикатыгар лабораториятын старшай научнай үлэһитэ Полина Голикова кэпсииринэн, учуонайдар бу СЦА1 ыарыыны кутуйахха искусственнайдык ыҥыраннар, мемантин көмөтүнэн эмтээбиттэр. Онуоха кутуйах туруга биллэ тупсубут.
ХИФУ учуонайдара чинчийиилэрин тиһэҕэр тиэрдэн, саха популяциятыгар маннык ыарыылаах дьоҥҥо көдьүүстээҕин бэрэбиэркэлиэхтэрэ. Билиҥҥитэ өрөспүүбүлүкэбитигэр маннык ыарыылаах 380 киһи баар. ХИФУ Красноярскайдааҕы университеты кытта бииргэ үлэлииллэрэ сөбүлэҥ чэрчитинэн ыытыллар. Докумуон 2020 сыллаахха биэс сыл болдьохтоох баттаммыта.
Саха Өрөспүүбүлүкэтин пресс-киинэ.
news@sakha.gov.ru