Арассыыйа Суруйааччыларын сойууһун бэрэссэдээтэлинэн Николай Иванов талылынна

Бөлөххө киир:

Олунньу 15 күнүгэр Москваҕа Арассыыйа Суруйааччыларын сойууһун ХV сийиэһэ буолла.

edersaas.ru


Сийиэскэ Саха сирин Суруйааччыларын сойууһуттан икки дэлэгээт кытынна – саха норуодунай суруйааччыта Николай Лугинов уонна саха норуодунай бэйиэтэ, Саха сирин Суруйааччыларын сойууһун бырабылыанньатын бэрэссэдээтэлэ Наталья Харлампьева.

Бу сийиэскэ суруйааччы бүгүҥҥү балаһыанньатын, Арассыыйа элбэх национальностаах литературатын салгыы сайдыытын туһунан киэҥ кэпсэтии таҕыста.

1994 сылтан Арассыыйа Суруйааччыларын сойууһун үлэтин историческай наука доктора, суруйааччы Валерий Ганичев салайан кэлбитэ. Сийиэс үлэтигэр РФ Бэрэсидьиэнэ В.В.Путин култуураҕа сүбэһитэ  Владимир Толстой кыттыыны ылла. Кини сойуус бэрэссэдээтэлин кандидатуратыгар Госдума КПРФ-тан дьокутаатын Сергей Шаргуновы туруорда. Онон куоластааһыҥҥа икки кандидат туруоруллубута – Арассыыйа Суруйааччыларын сойууһун бырабылыанньатын сэкирэтээрэ Николай Иванов уонна дьокутаат Сергей Шаргунов. Куоластааһын түмүгүнэн, 164 делегат куоластаабытыттан 132 куолаһы ылан, Николай Иванов кыайда.

Арассыыйа суруйааччыларын салайар уорганнарыгар Николай Лугинов сопредседателинэн талылынна, оттон Наталья Харлампьева  Арассыыйа Суруйааччыларын сойууһун бырабылыанньатын чилиэнинэн буолла.

Хаартыскаҕа: Сийиэс дэлэгээттэрэ. Хаҥастан уҥа: Калуга Суруйааччыларын сойууһун салайааччы Вадим Терехин, Саха сирин Суруйааччыларын сойууһун бэрэссэдээтэлэ Наталья Харлампьева, Карелия Суруйааччыларын сойууһун бэрэссэдээтэлэ Елена Пятиляйнен уонна суруйааччы Николай Коняев – “ЖЗЛ”  сериянан тахсыбыт Өксөкүлээх Өлөксөй туһунан кинигэ ааптара.

Татьяна МАРКОВА, «Саха сирэ» хаһыат, edersaas.ru

Ыспыраапка

Иванов Николай Федорович 1956 сыллаахха төрөөбүтэ. Львовтааҕы үрдүкү байыаннай-политическай училище суруналыыстыкаҕа факультетын үөрэнэн бүтэрбитэ. 1981 с. кинини Афаганистаҥҥа ыыппыттара. “За службу Родине в ВС СССР” уордьан III степенинэн, “За отвагу” мэтээлинэн, ЫБСЛКС КК “Воинская доблесть” бэлиэтинэн наҕараадаламмыта.

1985 с. “Советский воин”  сурунаал кэрэспэндьиэнинэн, онтон 7 сыл буолан баран кылаабынай эрэдээктэринэн анаммыта. Арассыыйа Суруйааччыларын сойууһун бырабылыанньатын сэкирэтээринэн үлэлээн кэллэ. Николай Иванов – 20 кинигэ ааптара.

+1
0
+1
0
+1
0
+1
0
+1
0
+1
0
+1
0