Арассыыйа Бырабыыталыстыбата 2030 сылга диэри дойдуга авиация салаатын сайыннарар аналлаах бырагырааманы ылынан бигэргэттэ.
Бу салааны РФ бастакы вице-премьерэ Андрей Белоусов үүннүөҕэ-тэһиинниэҕэ, оттон сөмөлүөтү оҥоруу чааһыгар РФ вице-премьерэ Юрий Борисов эппиэтинэстээҕинэн ананна. 2030 сылга диэри Арассыыйа авиахампаанньаларыгар 1 тыһ. тахса сөмөлүөтү, 760-тан тахса бөртөлүөтү уонна 5 тыһ. кэриҥэ көтөр аал мотуордарын оҥоруохтара. Бырагыраама уопсай бүддьүөтэ 770 млрд солк. тэҥнэһэр.
Бырабыыталыстыба мунньаҕар вице-премьер Юрий Борисов иһитиннэрбитинэн, 2023 сылга Арассыыйаҕа оҥоһуллубут ПД-8 бортовой радиоэлектроннай тэриллэринэн уонна систиэмэлэринэн хааччыллыбыт «Суперджет Нью» сөмөлүөтү оҥорон таһаарыы саҕаланыа. Былаан быһыытынан бу күҥҥэ диэри омук сириттэн атыылаһыллар орто уонна ыраах далааһыннаах сөмөлүөттэри МС-21 уонна Ту-214 диэн аҕа дойдуга оҥоһуллар көтөр ааллар солбуйуохтара. Бырабыыталыстыба былаанынан маҥнайгы алта МС-21 сөмөлүөт 2024 оҥоһуллан көтүөҕэ. 2029 сылтан сыл аайы 72-лии МС-21 диэн көтөр аал собуоттан оҥоһуллан тахсыаҕа. 2030 сылга диэри 70 ТУ-214 оҥоһуллуоҕа.