РФ бырабыыталыстыбатын бэрэссэдээтэлин солбуйааччы Марат Хуснуллин бэлиэтээбитинэн, тутуу эйгэтигэр бытаарыы суох.
Бу күннэргэ РФ бэрэсидьиэнэ Владимир Путин экэниэмикэ боппуруостарыгар мунньах ыыппыта. Онно кини тыа хаһаайыстыбатыгар, тутууга үчүгэй көрдөрүүлээх иһэрбитин иһитиннэрбитэ. Түөрт ый түмүгүнэн Арассыыйа үрдүнэн 37,6 мөлүйүөн кв м дьиэ тутуллубут. Ити былырыыҥҥы туһааннаах ыйын кытары тэҥнээтэххэ, 58 % элбэх.
РФ бырабыыталыстыбатын бэрэссэдээтэлин солбуйааччы Марат Хуснуллин мунньах кэнниттэн бэлиэтээн эппитинэн, тутуу эйгэтигэр бытаарыы суох. “Дойду үрдүнэн тутулла турар дьиэлэрбит-уоттарбыт элбээн иһэллэр. Салгыы да бу маннык тэтиммитин ыһыктыбакка үлэлиир санаалаахпыт. Бүгүҥҥү күҥҥэ олорор дьиэлэри тутууга, суолларбытын оҥорууга биһиэхэ ханнык да кэминээҕэр үчүгэй көрдөрүүлээхпит”, – диэн иһитиннэрэр кини. Манна даҕатан эттэххэ, билигин национальнай бырайыагынан 300 суол эбийиэгэ олоххо киирдэ. Биһиэхэ Саха сиригэр “Халыма”, “Бүлүү” федеральнай суоллар өрөмүөннэнэ сылдьаллар.
Арҕааҥҥы дойдулар араас хааччаҕы киллэрбиттэрэ тутуу матырыйаалын оҥорон таһаарыыга улаханнык охсубата. “Тутуу эйгэтэ тастан киирэр матырыйааллартан улаханнык тутулуктаммат. Билигин төттөрүтүн дойдубутугар тутуу матырыйаалларын оҥорон таһаарыы үрдээтэ. Холобур, бу түөрт ый түмүгүнэн бырамыысыланнай оҥорон таһаарыы индекса былырыыҥҥыны кытары тэҥнээтэххэ 104 % тэҥнэспит буоллаҕына, сорох тутуу матырыйаалларын оҥорон таһаарыы 10 бырыһыан үрдээтэ. Кирпииччэни оҥоруу – 12-18%, бетон – 26%, тимир конструкциялары оҥоруу – 14 % үрдээбит”, – диэн иһитиннэрэр Марат Шакирзянович.
Аграфена КУЗЬМИНА