Дойду үрдүнэн ыарыы тэтимэ кыралаан намтаан эрэрэ көстөр. Олунньу 11 күнүгэр Арассыыйа үрдүнэн 203 949 киһи ыалдьыбыт буоллаҕына, олунньу 12 күнүгэр 197 949 киһи коронавируска сутуллубута биллибит. Бу туһунан Бүтүн Арассыыйатааҕы коронавирус тарҕаныытын утары үлэлиир Суһал ыстаап биллэрэр.
Ити күн, олунньу 12 күнүгэр, 12 653 киһи балыыһаҕа киирбит, бу иннинээҕи күн көрдөрүүтүттэн 31,9% намыһах. Итинтэн сылыктаатахха, Арассыыйа үрдүнэн госпитализация таһыма биллэрдик түһэн эрэрэ көстөр.
Эрэгийиэннэри тэҥнээн көрдөххө, сутуллуу ахсаанынан Санкт-Петербург куорат үс күн устата бастакы миэстэҕэ турар. Манна олунньу 12 күнүгэр 20 136 киһи дьаҥҥа сутуллубут. Иккис миэстэҕэ Москва куорат турар — 12 496 киһи, үһүс миэстэҕэ Москва уобалаһа турар. Манна 7 349 киһи коронавируска сутуллубут.
«Саха сирэ» хаһыат, edersaas.ru
Хаартыска sakha.gov.ru