Арассыыйа үрдүнэн 20 бастыҥ эрэгийиэн ахсааныгар киирдибит

Бу күннэргэ биир үөрүүлээх сонун быһыытынан, өрөспүүбүлүкэ нэһилиэнньэтин ахсааныгар табаары уонна өҥөнү оҥорон таһаарыы кээмэйинэн сүүрбэ бастыҥ эрэгийиэн ахсааныгар киирдибит. СӨ Экэниэмикэтин миниистирэ Майя Данилова этэринэн, ВРП аан бастаан триллион солкуобайы куоһаран, Саха сирэ Уһук Илин үрдүнэн бастакы миэстэҕэ, Арассыыйаҕа сүүрбэ бастыҥ эрэгийиэн кэккэтигэр эрэллээхтик киирдэ.  

edersaas.ru

Кэлиҥҥи алта сыл иһигэр бырамыысыланнай оҥорон таһаарыы улаатан, Саха сирин экэниэмикэтэ 2017 сылы кытта тэҥнээтэххэ, 5% үрдээтэ. Уһук Илин тэрилтэлэрин кытта тэҥнээн көрдөххө, өрөспүүбүлүкэ федеральнай бүддьүөккэ нолуок киириитин 48% хааччыйар.

Олохтоох экэниэмикэ өрө тахсыытын Санкт Петербурга аан дойду таһымыгар ыытыллыбыт экэнэмиичэскэй форум кэмигэр Владимир Путин бэлиэтээтэ. Кини инвестиционнай эйгэни тупсарыыга Саха сирэ, Приморскай кыраай, Самарскай уобалас, Крым, Хотугу Осетия, Пермскай кыраай, Нижегородскай, Ивановскай, Новгородскай уобалас, Удмуртия инники күөҥҥэ тахсыбыттарын туһунан эттэ. Онон национальнай бырайыактарга чааһынай хапытаалы киллэрэргэ тустаах үлэ барыахтааҕын, ону көҕүлүүргэ ыҥырда.

Инвестиционнай эйгэ национальнай рейтинигэр урукку өттүгэр Саха сирэ 52 миэстэҕэ турар этэ, оттон билигин 22 миэстэҕэ өрө таҕыста.

2018 сыл түмүгүнэн, Саха сирин экэниэмикэтин сайыннарарга 403 миллиард солкуобай үп киирбит. 2018 сылы кытта тэҥнээтэххэ, инвестиция 1,9% үрдээбит.

Экэниэмиэкэ бигэ туруктанарыгар судаарыстыба иэһэ 46% — 36% диэри биллэрдик кыччаабыта төһүү күүс буолла. СӨ Үбүн миниистирэ Валерий Жондоров этэринэн, 2019 сыл саҥатыгар 50,6 миллиард солкуобай иэс баар этэ. Онтон бүддьүөт кирэдьиитэ сабыллан, судаарыстыба иэһэ икки төгүл 14 миллиартан – 6 миллиардка диэри түспүт. Биир сыл иһигэр иэс 1,1 миллиардынан кыччаабыт.

Санкт Петербурдааҕы экэнэмиичэскэй форумҥа «Росгеология» хампаанньаны кытта түһэрсиллибит сөбүлэһии быһыытынан, инникитин өрөспүүбүлүкэҕэ сир баайын көрдүүргэ, ону үөрэтэргэ, туһаҕа таһаарарга инвестордары көрдүүргэ «биир кэлим түннүк” оҥоһуллуоҕа.

Кэлэр биэс сылга социальнай-экэнэмиичэскэй сайдыы сүрүн соругунан нэһилиэнньэ дохуотун үрдэтии, тиийиммэт буолууну, дьадайыыны аҕыйатыы үлэтэ ыытыллыаҕа.

Марианна Тыртыкова, «Саха сирэ», edersaas.ru