Арассыыйа лидердэрэ: финалга тахсарга куонкурус кыттыылаахтара бэйэлэрин регионнарыгар социальнай бырайыагы олоххо киллэриэхтээхтэр
“Арассыыйа лидердэрэ” куонкурус кыттыылаахтара соцбырайыактары регионнарыгар олоххо киллэриэхтээхтэр. Бу туһунан РФ бэрэсидьиэнин дьаһалтатын баһылыгын бастакы солбуйааччы Сергей Кириенко ахсынньы 24 күнүгэр куонкурус кэтэхтэн түһүмэҕин түмүктэригэр анаммыт брифиҥҥэ эттэ. Полуфиналистартан хас биирдиилэрэ бэйэтин регионугар социальнай бырайыагы олоххо киллэриэхтээх. Маныаха тэрийээччилэр бэлэм кейстэри эппэттэр: хас биирдии кыттааччы олоххо киллэриэхтээх социальнай кыһалҕатын бэйэтэ талыахтаах. Сыалы ситиһэр туһугар кыттааччылар хамаанда тэриниэхтээхтэр. Онон сорудах кыттааччылар ырытар уонна быһаарыыны ылынар кыахтарын тэҥэ тэрийэр дьоҕурдарын бэрэбиэркэлиэҕэ.
Өйөбүлү кыттааччылар Волонтердар кииннэрин ассоциациятыгар, регионнааҕы уопсастыбаннай палааталарга уонна Бэрэсидьиэн граннарын фондаларыгар ылыахтарын сөп.
ТАСС иһитиннэрбитинэн, Кириенко социальнай бырайыактар куонкурустарын сүрүн тутуһуллуохтаах усулуобуйаларын ааттаата: “харчынан төлөһөр табыллыбат”. “Ол эбэтэр биһиги элбэх харчылаахтарга куонкуруһу тэрийбэппит. Кыһалҕаны быһаарыыга харчы наада буолар түбэлтэтигэр туһанар сөп эрээри, бу харчынан кэмнэммэт”, — диэтэ кини. Маныаха аһымал санаа ааҕыллыбатын бэлиэтээтэ. Үчүгэй бырайыагы олоххо киллэрэр эрээри финалга атын критерийдэринэн ааспатах кыттааччыга кэтээн көррө сэбиэт өйүүр тиһиги көрүөҕэ.
Санатан эттэххэ, салайар кыахха анаммыт тургутууну ситиһиилээхтик ааста уонна полуфиналга Саха сирин алта олохтооҕо тиийдэ: Александр Сафронов – РФ Бэрэсидьиэнин иһинэн СӨ Бастайааннай бэрэстэбиитэлин бастакы солбуйааччы; Александр Климентьев — РФ Бэрэсидьиэнин иһинэн СӨ Бастайааннай бэрэстэбиитэлистибэтин судаарыстыбаннай былаас федеральнай уорганнарын кытта үлэҕэ, инвестиционнай уонна инновационнай бэлиитикэҕэ управлениетын сүбэһитэ; Игорь Николаев – “СӨ Стратегическай чинчийиилэргэ киинэ” ГАУ салайааччыта; Евгений Григорьев – “Дьокуускай куорат” куораттааҕы уокурук “Сирдэри-уоттары сайыннарыыга агентствота” МУП салайааччыта; Марианна Петрова – “Саха сиринээҕи ГТХА” ИДПО тэрилтэ дириэктэрэ; Василина Лукина, Уһук Илин ФУо Арассыыйа эдэр ыччатын ассоциациятын сүрүннээччитэ.
Ыспыраапка:
“Арассыыйа лидердэрэ” куонкурус – көхтөөх гражданарга үлэлиир социальнай соруктары тэрийэр аналлаах “Арассыыйа – кыахтар дойдулара” платформа бырайыага. Бастакы сезон 2017 сыл алтынньы ыйга саҕаламмыта уонна 2018 сыл олунньу ыйыгар түмүктэммитэ. Кыттарга сайаапка биэрбит 200 тыһыынча кэриҥэ киһиттэн 103 кыайыылааҕы быһаарбыттара. Бастакы сезон 67 кыттааччыта дуоһунастарга анаммыттара, ол иһигэр икки кыттааччы губернаторынан, үс киһи – федеральнай миниистирдэр солбуйааччыларынан.
Иккис куонкурус атынньы 10 күнүгэр саҕаламмыта. Бырайыакка кыттарга 227 тыһыынча киһи регистрацияламмыта. 91 тыһыынчаттан тахса киһи кэтэхтэн түһүмэххэ кыттар кыаҕы ылбыттара.
edersaas.ru