Арассыыйа — Кытай: кыраныысса таһынааҕы бастакы тимир суол муостатын тутуу түмүктэннэ
Арассыыйа аан бастаан Амур тимир суолун муостатынан туораата уонна экэниэмикэҕэ бииргэ үлэлиир партнеругар – Кытайга чугаһаата. Амуру туоратар тимир суол Арассыыйа-Кытай судаарыстыбаннай кыраныыссатын учаастагар Еврейскэй автономнай уобалас Нижнеленинскэй сэлиэнньэтин чэрчитигэр тутулунна.
Муоста Арассыыйатааҕы өттүттэн бастакы буойаһы Бэрэсидьиэн Уһук Илиҥҥэ боломуочуйалаах бэрэстэбиитэлэ Юрий Трутнев аһарда.
“Биһиги дойдуларбыт икки ардыларыгар тимир суолунан бастакы туорааһын эскпорт саҥа маршрутун тутаах сиринэн буолуоҕа, Уһук Илиҥҥэ саҥа оҥорон таһаарыыны уонна логистика хабын тэрийиигэ көмөлөһүөҕэ. Уһук Илин хас да эрэгийиэнигэр айаны-сырыыны тупсарыаҕа”, — диэн Трутнев бэлиэтээтэ.
Муоста Уһук Илин экэниэмикэтин барытын уларытыаҕа. Бу үлэҕэ киириитэ Уһук Илин оҥорон таһаарааччыларыгар олус наадалаах. Чуолаан, сааҥсыйа дьайыыта бүрүүкээбит ыгым кэмигэр.
Муостанан таһаҕаһы түргэнник тиэрдиэхтэрэ. Ол курдук, Арассыыйа киэҥ Азия ырыынагыттан табаары уонна технологиялары быһа уонна түргэнник ылар кыахтаныаҕа.
Кытайга туох барыта оҥоһуллар. Бу муоста ону ыларга уонна Уһук Илин нөҥүө дойдуга тарҕатарга төһүү буолуоҕа. Маныаха кыраныысса таһынааҕы сирдэр-уоттар сайдыахтара. Арассыыйаны кытта эргинии көмөтүнэн Кытай кыраныысса таһынааҕы куораттара барыта кэриэтэ чэчирии сайдыбыттара, аны биһигини оннук кэм күүтэр.
Муостаны эрэ туппатылар. Инфраструктурата эмиэ тэрилиннэ. Ленинскэй-1 ыстаансыйа саҥардылынна, өссө биир ыстаансыйаны уонна аһарар пууну тутан дьэндэттилэр. 62 дьиэ тутулунна – тэхиньиичэскэй хааччыйыы паарката, ыттары иитиигэ служебнай дьиэ, таможня уонна пограничнай сулууспа. Онон Арассыыйа өттүнээҕи уопсай уһуна тиксэр сирдиин 5 тыһ. км тэҥнэһэр.
Ый устата муостаны толору кээмэйинэн үлэлэтии саҕаланыаҕа. Кытай хайыы-үйэ састаабы Арассыыйаттан көрсүүгэ бэлэм. Саҥа туһаайыы бу Кытайга эрэ айан буолбатах, бу АТР дойдуларыгар Уһук Илин тиийэригэр саҥа кыахтары арыйар. Онон Амур мууһа уулларын кэтэспэккэ, атыы-эргиэн сылы эргиччи барыаҕа.
Муостанан туорааһын буойастары Арассыыйа уонна Кытай ирдэбиллэринэн маннык колеялаах аһарар: 1520 мм уона 1435 мм.
Муоста туһунан чахчылар:
Сыаната — 9 млрд солкуобай
Муоста уһуна — 2 тыһ. 209 м
РФ өттүгэр — 309 м
Табаар эргийиитэ – икки өттүгэр сылга 20-24 мөл туонна
Бородууксуйаны тиэрдии уһуна 700 км аччыаҕа
Тутууга 900 киһи уонна 215 тиэхиньикэ үлэлээбитэ.
РФ Бэрэсидьиэнин Уһук Илин ФУо боломуочуйалаах бэрэстэбиитэлин пресс-сулууспатын иһитиннэриитинэн
Бэлэмнээтэ Женни Стрюкова
Хаартыска: тустаах саайтан