Кулун тутар ыйтан Арассыыйа кыраныыссалара сабыллан турбуттара. Биирдиилээн рейстэр эрэ көҥүллэнэр этилэр. Дипломаттар, кинилэр кэргэттэрэ уонна сөмөлүөт экипаһа эрэ кыраныыссалары туорууллара көҥүллэнэрэ.
Премьер Михаил Мишустин бүгүн кыраныыссаны арыйар ыйаахха илии баттаабытын туһунан эттэ. Ол чэрчитинэн, атын дойдуларга үлэлии, үөрэнэ, эмтэнэ, аймахтары көрө, бүөбэйдии барар көҥүллэнэр. Ону тэҥэ, омук дьоно Арассыыйаҕа эмтэнэ уонна аймахтарын көрө, бүөбэйдии киириэхтэрин сөп.
Бэрэсидьиэн пресс-сэкиритээрэ Дмитрий Песков атын дойдуларга сөмөлүөтүнэн көтүүнү көҥүллээһин чопчу даатата биллэ илик. Сыыйа арыйар былааннаахтар. Көрдөрөр-иһитиннэрэр сириэстибэлэр суруйбуттарынан, «Росавиация» от ыйын 15 күнүттэн 15 дойдуга көтөргө бэлэм.
Европа сорох дойдулара, холобур, Турция, Италия, Чехия, о.д.а. эмиэ кыраныыссаларын арыйан эрэллэр. Ол эрээри, Шенген зонатын дойдулара сабыылаахтар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.