Арассыыйа Култуураҕа пуондата В.К.Арсеньев аатынан “Уһук Илин” бириэмийэни өйүөҕэ
Арассыыйа Култуураҕа пуондата В.К.Арсеньев аатынан “Уһук Илин” бириэмийэ партнерунан буолла. Бу сыл ахсынньыга Уһук Илиҥҥэ айымньыларын айар суруйааччылары үөрүүлээхтик эҕэрдэлээһиҥҥэ пуонда иккис сылын кыттыаҕа.
Маны сэргэ Пуонда бириэмийэ туһунан иһитиннэрэр хампаанньаҕа көхтөөхтүк кыттыаҕа. РФ искусствотын уонна култууратын эйгэтигэр бөдөҥ кэмиэрчэскэйэ суох тэрилтэ В.К.Арсеньев аатынан “Уһук Илин” бириэмийэни өйүүргэ быһаарыммыта түбэһиэхчэ буолбатах.
Пуонда сайдыыта “Култуура сыаннастарын харыстааһын, баһылааһын уонна хаҥатыы” диэн девизкэ тирэҕирэр. Бириэмийэ сүрүн соругунан кыайыылаахтары наҕараадалааһын эрэ буолбакка, Уһук Илин култууратыгар интэриэһи тардыы буолар.
Пуонда бас-көс киһитэ Никита Михалков пуонда уонна бириэмийэ сыаллара биирдэрин эттэ.
”Литератураҕа бириэмийэлэр олус наадалаахтар! Бастатан туран, уус-уран уобарастар уонна култуура үгэстэрин нөҥүө кэлэр көлүөнэҕэ биһигини туох тулалыырын туһунан кэпсииллэр. Литература айымньыларын сюжеттарын көмөтүнэн ааҕааччыны долгутары сэргэ бу кинилэр олорор сирдэрин-уоттарын тыынын иҥэрэллэр, кэрэ айылҕатын, үгэстэрин кэпсииллэр”, — диэн санаалаах Никита Михалков.
Бириэмийэ РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев көҕүлээһининэн олохтоммута. Бириэмийэ үс номинациялаах: “Уһун проза”, “Кылгас проза”, “Оҕолорго проза”. Хас биирдии номинацияҕа лауреаттар 500 тыһыынча солкуобайы ылыахтара.
Быйыл куонкуруска 144 айымньы киирбитэ, итинтэн куонкуруһу 94 ааспыта. Уһук Илин тиэмэтигэр айымньылар бу уокуруктан эрэ буолбакка, Арассыыйа киин өттүттэн кытта киирбиттэрэ. Ол курдук, Арассыыйа 17 субъега кыттар: Краснодар кыраайа, Смоленскай, Волгоградскай, Саратовскай уонна Нижегородскай уобаластар, Санкт Петербург, Москва уонна Москва уобаластара, Татарстан, Саха Өрөспүүбүлүкэтэ, Бурятия, Забайкалье, Амур, Сахалин уонна Магадан уобаластара, Хабаровскай уонна Приморскай кыраайдар.
Бэлэмнээтэ: Женни СТРЮКОВА
Хаартыска: сахагов саайтан